１。回顧
德國出局，心情唔靚，但生活仍要繼續，與其研究奧斯爾垃唔垃圾，不如睇下剩低十六隊。先睇返我哋之前嘅預測，同埋有咩可以微調下，再估過。先旨聲明唔係唔啱改到啱，舊嘅文依然在，貼決賽巴西對德國嘛，錯到七彩啦。但有新資料梗係新篇新嘅，同埋研究有冇得微調
最多人問又最難答嘅問題，Elo rating 準唔準？只能等你，要好準就唔使踢，畀個妹巴西得了。至少佢係準過馬會賠率，或者FIFA排名
睇返最原本，即係未踢第一場之前兩篇文。唔講戰術人腳，純數字分析世界盃分組同奪冠，同埋劇本決賽就係巴西對德國，巴西捧盃，報仇成功。當時估嘅八組首名次名就係下面呢十六隊啦
開賽前預計的晉級路線圖
Ａ組估烏拉圭俄羅斯，次序都啱埋。B組直頭西班牙葡萄牙一二三四中晒。C組估法國秘魯，點知出法國丹麥，但秘魯冇乜運。D組估阿根廷克羅地亞，結果掉轉，就真係抵錯。E組呢，估巴西瑞士，又係次序都中。F組估德國墨西哥，結果係瑞典墨西哥，一樣抵錯，但照計好少人估到。G組估英格蘭比利時，結果掉轉，而最尾一場其實任佢地揀。H組估哥倫比亞波蘭，結果哥倫比亞日本，日本都係有啲運仔的。
即係，十六隊，我估中十三隊。排名都中埋嘅有九隊。唔算太好，但亦唔算太差。咁幾時都話任何系統都有局限性，特別世界盃鬥單循環，計得失球唔計對賽，以及計黃牌之類都係一個問題。
２。展望，版本一
開賽時的Elo Rating
克羅地亞分數勁升，阿根廷大跌，英格蘭都要跌。好啦，然後又點呢？如果跟而家十六強，咁好簡單啫，用最新嘅Elo Rating排一次。留意三場波踼落，已經有唔少Rating Change．今屆最大冷門當然係德國輸畀韓國嗰場，韓國拎咗80分，德國跌咗80分，不過兩隊出咗局睇唔到咁解。睇返賽前，德國排第二，而家已經去到第六—而後面啲隊仲有機會過佢頭。另外，拎得多分嘅，包括烏拉圭同比利時（三戰三勝），克羅地亞（三戰三勝兼大炒阿根廷），同埋瑞典（贏墨西哥一場拎唔少）。丹麥都不錯（贏咗排名高嘅秘魯，又悶和法國）。葡語系巴西葡萄牙其實拎分唔多，因為和咗場波，而贏嘅只係雞隊，拎唔到咩分。留意有啲隊出線但分數仲低過未出線前，例如驚濤駭浪出線嘅阿根廷，西班牙就主要因為打和摩洛哥，墨西哥就因為輸畀瑞典。仲有大家讚到天下有地下無嘅英格蘭，其實都係分數仲低過未開賽前。你話，喂，大炒巴拿馬喎。係，但，巴拿馬咋。加埋突尼西亞一場，拎少少分—兩場夾埋未夠輸比比利時一場失。當然呢場兩隊都冇盡力。但數就係咁計。Elo rating就係咁，強隊贏波應份，只會拎少少分。輸波就大件事。反之亦然。
分組打完後的Elo rating，留意有啲唔關事出咗局嘅我冇放入嚟
咁照返更新咗嘅Elo Rating 計埋線路，出嚟嘅後果就係下面呢張圖。留意用咗英文，因為........公司有人問
最新形勢圖
睇唔到嘅，都好簡單，葡萄牙同烏拉圭近磅，但葡萄牙可晉級。法國高阿根廷一班波，超過六四波。巴西比利時更加係冇難度。另一邊呢，英格蘭同哥倫比亞真係激烈，睇好英格蘭險勝（但你估佢射十二碼出局都得）。雙瑞大戰預計都惡鬥，但瑞士秤高啲。克羅地亞同丹麥六四波，但我估輕易晉級。西班牙同俄羅斯就好明顯西班牙了，除非主辦國又出術（頭兩場有人話食藥）。
八強，巴西輕取比利時，法國高葡萄牙少少。西班牙又高克羅地亞少少。英格蘭對瑞士冇想像中輕鬆但應都OK，可以入四強。四強呢，巴西依然可以輕鬆搞掂法國。西班牙對英格蘭都不太難。最後決賽巴西捧盃。係呀，巴西應該係好屈機的。
３展望，版本二
試下新嘢，改進下Elo Rating，計埋近態。咁當然，整啲新意啦。再講一次，冇系統係完美。但可以諗下點整好啲。咁你都知Elo Rating係由以往表現睇，唔掂嘅隊會減分，比FIFA排名之類快好多，但可能都係唔夠快。我大膽試下做少少改進。
寧買當頭起，莫買當頭跌。個出發點好簡單，如果十六強，兩隊波都係1600分，但一隊係最初1700分，失利後跌落嚟，一隊係最初1500分衝上嚟。二揀一，我估多數人都會揀衝上嚟嗰隊。可能係士氣，可能狀態好，可能之前個rating低估咗，可能佢地有塞錢畀球證。咩都好，似乎睇返呢三場嘅分數轉變，係有幫助嘅。
亦都係點解上面我講咗一輪邊啲隊三場後分數高咗或低咗。克羅地亞呢啲係當頭起，阿根廷係當頭跌。你係要拗克羅地亞會冇體力或者會驕兵必敗，就冇得講。正如你可以話阿根廷死裏逃生知恥更乎勇—但唔見得德國係咁。
好啦，我用嘅方法，好簡單，佢哋呢一刻嘅分，我再加埋佢地呢三場平均得嘅分上去（你可以唔用平均用總數，咁就仲激，自己玩啦下）。
在最新分數上，加埋往三場平均賺到嘅分數
結果就係好似上面講，克羅地亞會再加高啲，阿根廷會拉低啲。
有乜影響？原本葡萄牙好似高烏拉圭少少，計埋近態呢，變咗五五波，甚至烏拉圭仲高少少。哥倫比亞呢？就由原本低過英格蘭，到差不多平手（但講真，其實爭好少好少，仲要冇考慮占士洛迪古斯傷呢類情況）。
其實分別不大，只係克羅地亞優勢更明顯（但依然唔夠西班牙踢）。另一邊阿根廷對法國更難踢，烏拉圭葡萄牙可以執位，但都係唔夠法國嚟
整出嚟，其實唔係太大唔同，上線依然係巴西淘汰法國入決賽。下線西班牙都係入決賽，不過考慮到哥倫比亞追咗上嚟，就大膽估下英格蘭又十二碼出局。但講多次，講真，真係差不多平手—而兩隊都應該過唔到西班牙。
如果你噓話「搞完咁多咪又係咁」嘅，你自己可以用三場總數代替三場平均的。我就只係示範個思路。
八強就未必再寫了。