論控球、論組織、論技術，日本點都係唔夠踢慣大賽嘅比利時鬥；但係喺今場日本身上，睇到咩叫熱血。
個個都係拼命三郎，五五波同你搏曬老命去到盡，就算追唔到都同你死埋落去，身高輸蝕都合埋眼同你鬥頂，完全係有《踢出我天地》加賀美嗰種死都唔畀你入嘅熱血。
佢哋係唔夠比利時踢，但成隊完全唔會怕同你對攻，仲要踢得一啲都唔失禮，慢慢猜上去做攻勢，反而比利時有啲老鼠拉龜。日本嗰種齊上齊落嘅團體紀律性成功守住比利時攻勢，吉田麻也、昌子源面對高空轟炸咬緊牙關頂埋去；原口元氣、大迫勇也走到扯哮都吸埋最後嗰口氣走埋去；就連今屆無限派膠嘅川島都有幾下神救，今場成隊日本完全展現出超水準表現。
被追和嗰兩球，完全唔係任何人犯錯，而係真係輸亞洲人身高，對方擺明係搵個高佬入嚟頂。最後本田角球無功而還，更反被比利時絕殺，但係本田嗰下進攻話畀球迷聽，佢哋係想好想90分鐘內贏呢場波。
完場嗰刻成隊波都虛脫喘晒氣，昌子源更加係不斷打草地洩忿，嗰刻真係好唔甘心，唔甘心成場波嘅努力換嚟咁嘅結果，但唔甘心都無辦法改寫戰局，永遠冇辦法去返上一頁，比利時最後嗰下反擊做得好，盧卡古亦漏得靚，只能仰天長嘆可惜。
世界盃前夕，日本先炒教練、繼而選咗班唔係預期會入選嘅球員、熱身賽5場贏得1場，人人對今屆嘅日本毫無期望，做硬三零部隊，但最後佢哋分組賽2－1贏哥倫比亞、2－2賽和塞內加爾，成功打入淘汰賽之餘，今場波仲要曾經領先比利時2－0，一切一切完全超越預期所想。
雖然最後結果不似預期，甚至更加覺得佢哋不止於此，但係佢哋今場波完全展現了武士道嘅不死精神，強如比利時都要去到最後一刻先險勝，即使成為最終贏家，但輸波嘅日本同樣值得掌聲鼓勵。
一場精彩熱血嘅波，最後結果竟然係咁，真係會睇到人眼濕濕，真係好想好想佢哋贏落去，走得更遠。
晉級嗰陣佢哋畀人話非常醜陋，但今場波佢哋用行動話畀批評者聽，佢哋嘅足球哲學一啲都唔醜之餘，仲好鬼死熱血！就算呢種唔係叫光榮出局，都會係雖敗猶榮。
出盡力，真係無悔，日本今場波真係值得畀掌聲。