圖片來源：JawaPos.com
尋日喺Pakansari Stadion舉行嘅印錦賽A其中一場賽事由印尼軍主場對佩斯查，由於球場位於西爪哇省茂物市(Bogor)，距離佩斯查根據地雅加達只有60公里遠，因此吸引唔少佩斯查球迷南下睇波，結果印尼軍主場被佩斯查球迷成功騎劫，場波有26,213人買飛入場，據講有最少2萬係佩斯查球迷，但實際入場人數應該唔止26,213人，據講應該超過3萬人入場，個場只可以容納3萬人，即刻話有可能超載，不過有部分係衝入去或者爬入去，係冇買飛，其中一個印尼新聞網叫做JawaPos.com(爪哇新聞網)就有報導，有唔少由雅加達前往茂物嘅佩斯查球迷因為爬入場或衝售票處而被軍警抓捕，其中一個住喺德波(Depok)，今年17歲，名叫巴加斯(Bagas)嘅佩斯查球迷被捕時喊住口求班軍人放咗佢並話：「我還在上學，我喜歡考試，請先生不要抓我！先生，我只是沒有錢看球，但我真的喜歡看球！」
睇落去好慘咁，有啲國家地區用盡方法想人入場睇波但最後都係得一千幾百人，而印尼嘅印錦賽A八成賽事係有電視直播，九成都係免費電視台播放，冇乜錢買飛但有電視都可以睇電視直播，不過唔少印尼球迷都係鐘意親身入場，所以一啲比較窮嘅球迷可能會用盡各種方法入場睇霸王波，不過亦有唔少係畀得起錢但就唔願畀錢寧願爬幾米圍欄入去。
而JawaPos.com(爪哇新聞網)最後補充，巴加斯被軍佬抓獲前曾極力反抗，甚至連軍警都打，不過被抓捕後就喊晒口，是真是徦不知道。另外由於場波比預期多人入場，為防止混亂球場大門都提早關閉拒絕場外球迷入場，結果有幾千名球迷聚集於場外大叫「開門」，仲有球迷向軍人及警察掟雜物，不過就冇變成大型騷亂，於是就有更多人嘗試從四方八面爬入去，但當中有球迷係買咗飛但入唔到場，由於分分鐘冇得退飛，令到呢班有畀錢但只係遲些少入場嘅球迷更加扯火，因為佢哋用真金白銀買飛，結果因為防止混亂之因提早落閘，連佢哋都謝絕埋，咁究竟係咪要好似班唔肯畀錢嘅球迷一樣爬入去睇波呢？咁畀錢買飛為乜呢？