今年度球季嘅乙組聯賽開季至今競爭激烈，港會、大埔、黃大仙、大中、觀塘積分接近，相信想升班嘅球隊唔止大埔一隊，咁咪好囉，雖然香港甲組對下已經係無敵WFC，但有競爭才有進步，正所謂沒有競爭哪會進步，如果是旦一隊超班玩晒場場大炒一隊獨大，長年係咁對球迷黎講可能就冇乜癮喇，今年乙組開季係唔錯，大埔要上返去真係唔可以放過每一場。不過，有啲人就認為競爭係冇Q用，係囉係囉競黎把柒咩，拜碼頭都唔識你連玩鞋嘅資格都冇呀！
講返足球，今日乙組其中一場比賽黃大仙對觀塘喺蒲崗村道公園1號場展開，頭場丙組油尖旺對荃灣睇唔切，不過油尖旺係想升嘅丙組地區球隊之一大家可以留意，至今不敗暫做龍頭，可唔可以喺2015-16賽季升上頂級聯賽言之過早，不過，如果有一日升上頂級聯賽，旺角場就可以物歸原主，旺角場真正主人先係油尖旺，所以爭咩爭呢。
講返黃大仙對觀塘，黃大仙整體技術係比觀塘好少少，默契幾好、傳送好少斷，組織都幾流暢，後防有前普高喀麥隆外援迪達，基本上有佢喺到可以殺晒咁滯，而隊長王景華係一位有速度技術嘅中場球員，上半場喺邊路係咁發難，睇少佢一陣都唔得。
上半場快上快落，可賞度不比甲組差，支配率及攻勢較多嘅黃大仙約29分鐘先開紀錄，中場直線放入禁區，正當以為大力得滯出界，黃大仙球員在喺底線拼命撈返個波入去，觀塘守門員及後防有誤會，你以為我接佢以為我出，就咁俾黃大仙後上嘅球員撞咗個波入去，1：0，半完場前黃大仙自由球開入禁區，迪達衝頂高出。下半場觀塘積極反撲，觀塘球員邊路斬入禁區，上半場好穩陣嘅迪達漏頂，後面觀塘球員無人理下立刻抽射點知嚴重撻Q。你唔入到我，黃大仙在憑反擊擴大比分到2比0，直到完場，黃大仙全取3分。