今日星期日梗係休息啦，仲做唔夠港奴咩真係哇，不過真係唔想困喺屋企對住部電腦睇印尼聯賽大戰低清直播萬隆對巴東咁單調，咁樣唔夠『毒』，梗係出去睇吓波咁先夠『毒』架嘛，甲組就今個月入咗元朗睇元朗對橫濱FC，所以今日都唔會入旺角或者青衣睇東方晨曦，臨近月尾就係百鬼夜行嘅時候，咩鬼咁猛？咪窮鬼囉，我呢啲人今朝有酒今朝醉，一到月尾就化成死狗兼窮鬼，大佬，月尾仲有亞協盃南華對越南寧平凱撒水泥，雖然對南華冇乜好感，不過話晒南華代表住香港去打亞洲比賽，當然最好就去現場支持吓，所以真係要留返啲預算。
本來尋晚決定咗今日入大埔睇乙丙組雙料過吓日子，點知訓到豬西咁款成12點幾先俾老母一把把咁摑醒，由我屋企出發入大埔都要差唔多一個鐘，就算趕到去頭場已經打咗幾個字，頭場由丁組升班馬光華對龍城康體，其實我比較想睇呢場多過尾場嘅和富大埔對屯門足球會，既然如此，只好改變計劃，正所謂「甲乙丙丁組梗有一場喺你左梗」，甲乙丙丁組其實同便利店差唔多，有時你途經見到嘅可能就係丙組賽事，問題係你有冇時間去關注，而今週丁組聯賽首飾對瑞聯及彩俊北區對東昇喺粉嶺遊樂場舉行，由我屋企出發入粉嶺最快半粒鐘就到，咁當然去就腳嘅地方算啦，但係講真，今季首飾嘅比賽我未睇過，上年4月嘅丁組聯賽首飾對淦源，首飾輸到2比6時，隊長譚興華喺場中大叫「喂！我地仲有機會！」，呢句說話令我對平平無奇嘅首飾隊印象深刻，可能個天都想我去睇，咁咪睇囉。
去到粉嶺遊樂場時頭場啱啱開波，紅衫嘅首飾派出射手李君俠、姚榮昌、 唐占士等球員，如果有關注低組別聯賽嘅球迷對唐占士唔會陌生，呢位港籍洋人球員施職前鋒，35歲，效力過浩運、喜利、東寶等球會，太太係香港華人，因為長期與華人接觸，廣東話比八兩金更流利。而黑衫嘅瑞聯今仗派出梁詒璋、關啟聰、姚文聰等球員，至今未喺丁組拎過一分，上仗0比16大比數不敵福建，機乎肯定下季會消失，如今任務就係打好每一場比賽。
由於瑞聯整體質素有限，好快首飾就控制大局，並喺13：48分喺娥眉月位置射入罰球領先1比0，然後到咗14：00分，首飾又喺咁上吓位置射入成2比0，不過今次唔係罰球，只係瑞聯後防失誤令首飾有機可乘，上半場首飾就係以呢2個入球領先瑞聯。
「吓！點解上次福建都可以半場炒瑞聯，首飾半場先拎住2球？福建同首飾咁高咁大咋喎？」
其實有咩咁奇啫，上週咩天氣，有心冇心嘅問題啫，睇開啲啦，有啲球員第二日仲要揾食架，有啲咪仲離奇，昔日丙甲場場吞10蛋以上嘅城市咪喺季尾試過贏前列嘅卜公，點解？自己諗吓囉。
講返場比賽，雖然瑞聯連半場都難過，但並冇因此放棄，有幾吓短傳落底幾有心思，不過雙方嘅埋身碰撞非常多，就喺半場啱啱完結嘅時候，瑞聯嘅箭頭梁詒璋與對方球員發生口角，場面一度混亂，肯好雙方最後和好如初，其實丁組圈子好細，好多球員彼此認識，有時可能過咗火而拗兩句互屌老母正常不過，互屌完揸揸手打個茄侖亦是朋友。
到咗下半場我出咗去『打邊爐』，錯過咗首飾喺14：35分唐占士嘅入球(唔肯定)，雖然瑞聯輸到3球但全隊上吓冇放棄過進攻，佢地嘅努力終有回報，喺14：57分一個截擊突襲追成1比3，連場邊熱緊身嘅東昇球員都大叫好波，但一分鐘之後唐占士頭鎚在攻破瑞聯大門，之後唐占士有多次機會但全數浪費，但呢位球員嘅級數依然屬於丁組前列，就算打乙組中游球會都有貨賣，佢唔係高速度型嘅前鋒，佢屬於柱躉式，埋門把握力未必十分好，但善於以身體質素及高度去為隊友開路及提供支援。
結果首飾大勝4比1，計埋呢場，瑞聯嘅成積係14負入6失72，上季丁組包尾嘅卜公失131球，如今尚有6場比賽，仲要面對丁組列強中西區、西貢及東昇，究竟有冇可能突破100大關？就要睇吓佢地喇。