最近一張有關印尼甲組聯賽嘅圖片喺國際間流傳，今次同暴力血腥腐敗無關，事源上個月峇里聯主場對婆羅洲，當峇里聯入波後球員不忘答謝各自相信嘅神，來自東努沙登加拉省阿洛島嘅Yabes Roni信奉基督教，而Ngurah Nanak就係峇里土生人，信奉印度教，Miftahul Hamdi就來自亞齊特區，信奉伊斯蘭教，雖然球員各有信仰，不過足球成為佢哋共同語言，大家不分你我企埋一齊答謝神，呢個畫面觸動世人神經。
印尼係一個規定國民必須有宗教信仰嘅國家，其中伊斯蘭教佔人口大多數，所以一般人對印尼印象離不開伊斯蘭色彩，其實仲有其他唔同嘅宗教信仰者生活緊，就以峇里聯為例，入面有伊斯蘭教徒，亦有印度教徒，佛教徒，基督教徒及天主教徒，大家信仰完全唔同，不過目標一致，就係驘波，足球變成團結佢哋嘅另一種宗教。
但足球以外又係點？宗教衝突依然好多，極端派伊斯蘭教徒不停針對異教徒，最近華人政界人物ahok亦因為基督徒身分被攻擊，最後監都坐埋，然後信基督及天主教為主嘅加里曼丹原住民亦同伊斯蘭教徒起衝突，多單襲擊教堂神廟出嘅事件不停發生，睇嚟要達到真正嘅宗教和平，仲有一段好長嘅時間。