Cristiane Rozeira de Souza Silva呢個名字，係我於07年女子世界杯上嘅最大發現，由於佢個名「水蛇春」咁長，所以我都會叫佢做姬絲甸安妮，呢個中文名係我當時為佢翻譯嘅，個陣喺內地讀書，睇開CCTV，其實真係唔知佢嘅粵語名稱，所以先自己作一個名俾佢，其實點解會睇女子世界杯，呢個原因就同當時嘅直播有關，由於我係一個鐘意踢波，一日到黑都鐘意踢波嘅人，當我返到屋企我都會打開電視睇下足球新聞，但凡有直播賽事，我都會望下，如果好睇就會繼續追，當時見到CCTV直播女子足球賽事，以我性格一定會望佢先45分鐘，結果望完之後，我竟然將呢屆世界杯所有焦點賽事全部都睇曬，好睇，女仔踢波原來都好好睇！
我好記得當時第一場揭幕戰係德國隊對阿根廷隊，喺晚上八點開波，以男子足球賽事黎講，呢場一定係強強對碰，點知開賽幾分鐘，德國已經入波，之後入波入唔停，對面個個阿根廷門將俾德國妹踢到懵佐，失誤同夢遊打孖上，結果俾德國大炒11：0，係個一刻我先知，原來阿根廷女足唔係強隊，而德國前鋒Birgit Prinz入左唔知三球定兩球，成隊德國隊霸氣外露，絲毫不遜色於男足，而我開始記住Birgit Prinz呢個名，並稱佢為佩琳絲，個場比賽佢簡直係無所不能，有速度，有爆發力，把握力勁，仲擅長為隊友鋪橋搭路，真係好勁。
第二日放學返到屋企，無聊打開電視，又見到美國隊大戰北韓隊，呢兩個國家喺政治上不嬲都唇槍舌劍，估唔到喺球場上都鬥得難分難解，而我第一個注意到係美國前鋒Abby Wambach，首先佢姿色係靚過佩琳絲，而且好有肉地，打中鋒黎講真係fit曬，見到佢撞開條北韓妹佢都未跌低就知佢把炮，而佢真係入到波，協助球隊逼和北韓妹，個場比賽從雙方球員面容睇得出，美國球員靚過北韓球員好多，如果美國球員似城市女仔，咁北韓球員就似鄉下妹，我見有幾個仲要生得好似男仔，而呢個Abby Wambach同美國門將Hope Amelia Solo好波之餘，姿色都唔錯，於是我又開始記住佢地兩個個名，並稱呼佢為鴨髀妹同蘇露姐姐。
到第三日，夜晚做曬功課，我就睇左新西蘭隊對巴西隊，一如既往喇，巴西女子足球唔使問阿貴都知佢勁，冇喇喇就炒人新西蘭5：0，巴西前鋒組合Marta Vieira da Silva同Cristiane Rozeira de Souza Silva之間配合得好好，呢場波令我對女子足球刮目相看，唔單只因為佢地大炒對手，而係從呢兩位球員身上睇到森巴足球精髓，佢地腳法好到真係媲美男足，呢個Marta 我之前都喺頒獎典禮見過佢，佢係06年世界足球小姐，個年仲同細哨合影添，而睇完佢踢波就知道佢拎獎係當之無愧，我覺得佢勁過佩琳絲同鴨髀妹，而Marta 隔離嘅Cristiane 有速度有技術，尤其盤扭得出神入化，如果硬要挑佢毛病，就係臨門一腳唔夠Marta，但係Cristiane靚過Marta好多，於是我又開始記住呢兩位球員，並稱佢地一個係瑪達，一個係姬絲甸安妮。
其實睇下女足，部分球隊的確失誤好多，完全好似未ready好咁，但德國美國巴西呢幾隊明顯睇得出係高班D，睇完場波會對佢地更加有印象，北韓隊勝在鬥志好，澳洲隊勝在身體大隻，中國隊勝在主場出擊，而呢幾隊都順利打入八強。
姬絲甸安妮喺三場比賽當中，入球不及瑪達，但過人技巧同配合非常嫻熟，我夠膽講佢絕對有羅賓奴嘅影子，而佢搭住瑪達成為巴西隊最引以自豪嘅武器。
巴西隊喺四強賽4:0大炒強隊美國隊，瑪達同姬絲甸安妮發揮優異，巴西隊如願與德國隊會師決賽，但決賽當中姬絲甸安妮表現一般，連瑪達都無法取得入球，兩人似乎被德國隊成功凍結，而最後輸俾德國隊0:2，對面的德國前鋒佩琳絲光芒四射，呢個冠軍為沉寂左幾年的德國球壇帶來喜訊。
如果冇睇世界杯，我唔會知女仔踢波都可以咁勁同咁型，記得07年暑假睇完美洲杯，見識到鄧加執教的防守巴西隊，簡直顛覆左我對巴西隊傳統的睇法，最後佢地憑借防守同羅賓奴巴迪斯達等人的光芒四射而奪得冠軍，而9月女子世界杯，我卻在姬絲甸安妮身上搵返我以前對巴西隊的記憶，就係技術好，有靈性，踢得賞心悅目。
我夠膽講，佩琳絲，鴨髀妹，蘇露姐姐，瑪達同姬絲甸安妮就算去踢男子隊都一樣唔會失禮，佩琳絲唔單只腳法好，防守都一流，真係前鋒典範，鴨髀妹就走位靚，蘇露姐姐身手好，瑪達同姬絲甸安妮之間的配合真係精彩。
事隔8年之後，15年女子世界杯將於6月6號開波，我已經錯過左11年日本女子隊揚威世界杯個屆賽事，今年點都要睇下世界杯，加上各大歐洲聯賽接近收咧，睇女子世界杯不失為一個好選擇，我頭先即刻資料research下，發現美國隊前鋒Alex Morgan美貌驚為天人，期待見識其腳法。