政府推銷西九一地兩檢，一日到黑都話方便呀經濟效益呀。建制派啦啦隊就仲勁，直頭話十幾分鐘都好緊要，為此要做一地兩檢好值得。我又唔怪呢班啦啦隊，因為事實上政府講高鐵未來50年的900億經濟效益，正正就係咁樣計出來的：估有幾多人會搭高鐵 x 估平均每個人慳幾多分鐘 x 香港人每分鐘值幾多錢(聽講係每小時43.2元)。
既然香港人的時間咁值錢，我好想知道每一次地鐵壞車，成個香港損失幾多錢。嗱，港鐵朝早繁忙時間每小時單向可載客量差唔多有50萬，如果每個人延誤10分鐘，乘條數出來經濟損失已經數以百萬計。呢幾日港鐵差唔多日日派彩，點解仲未有高官出來問責？乜政府唔係覺得香港人的時間好值錢咩？
如此落差，只得兩個理由：1) 有D人的經濟價值唔知點解會重要過第二D人；或 2) 用經濟價值來推西九一地兩檢只不過係藉口。
兩個理由，你揀邊個？