等左三日，終於到曙光隊授旗儀式的大日子。
民間記者葉蔭聰周末北上，臨走前叮囑我同阿野，務必出席曙光隊在九龍塘拔萃中學舉行的授旗儀式。我是個粗心大意的民間記者，過兩日已忘記乾淨，依稀記得唔知十一定一點。於是跟阿野預早行過男拔，但看更說今天沒有活動，撥個輪比聰頭，才知大家一樣甩晒轆。打比何渭枝，原來活動是喇沙書院舉行﹗
阿野：「唔怕啦，後面咪九龍塘囉﹗」行落先知，原來喇沙係係九龍城﹗唔係九龍塘﹗
周末的天氣不但迫出汗水，連「憎人富貴厭人窮」的情緒都迫埋出來。兩位大汗淋漓的臭男人，未到喇沙，先小喇巴。
不用筆者多介紹，喇沙書院是不少大醫生大律師大法官大富豪大粒佬的母校。從路邊已望到喇沙的面積、設計，足以媲美一間小型大學。原先我以為儀式頂多係社區中心舉行，現在來到超級中學，內心有點掙扎，曙光隊的授旗禮，會否變成妹仔大過主人婆的名門show？露宿者在眾賢達面前，將會被說成一班怎樣的群體？
兩星期前蘋果日報報導行政署拒絕曙光隊使用特區區徽，當時他們還未有身份參賽。事隔不夠一個月，望望場刊採通，曙光隊不但過了政府呢關，還得到不少名人大賈相助。政府官員、企業董事、甲組球會主席、社福界高層不單出席儀式，連場刊背面的贊助也榜上有名，今次究竟搞乜鬼？
出席授旗禮的傑志球會主席伍健說：「見到咁多位朋友坐係度，搞得成曙光隊去蘇格蘭，令我覺得，今次係一次美麗的官商勾結」。
聽老廢講，這次曙光隊進軍愛丁堡之所以得向方豪傑贊助商，多得出錢出力的企業家陳永柏(洋名Alex))穿針引線，還有他的死黨和富社會企業的李宗德先生。Alex演說時擺出數據，說有幾成參與過世界杯的露宿者找到工作，又有數十位跟職業球會簽約加盟。
一切數據都意味著，露宿者世界杯會給人曙光，他們透過踢足球找到新生活，找到另一段人生，另一段人生與新就業被畫上等號。社會促問題學生快點返回學校、夜青快點歸家、返中心捉棋，領隊又怎解理無業的露宿者？這是一個老問題。
趁一眾球星跟曙光隊操練，我跟阿野就拉住何渭枝吹兩句，訪問短短半小時，阿野發三問，何渭枝一五一十說個明白，為了保持原汁原味，我決定少有地將訪問原文照錄：
阿野：之前咪話政府果邊唔肯比曙光隊用區旗，依家又無乜問題，其實中間發 生咩事？
廢：其實開頭係行政署果邊唔批准，因為露宿者世界杯唔係國際足協舉辦賽，後來可能有媒體報左出來，政府受左壓力掛，又同我講可以。其實依家我地都唔知係代表中國定香港，主辦單位果邊寫我地係China Team， 但我地又用區旗。當然啦，我地都係帶國歌去，香港無區歌。
阿野：睇黎今次有不少人捲入這次露宿者世界杯，其實個過程係點架呢？
領男(插咀)：其實係咪政府果邊講左批准，係媒體鬧大左，先有咁多名人加入？
廢：開頭其實係Alex佢主動搵我地先既，政府批唔批准呢個唔成為一個issue。Alex一向有心搞社區服務，當然呢個係可以argue既，畢竟佢都係做緊d舊式既服務，好似佢有出錢起一座青年中心、辦學團體之類，但我敢講丫，香港沒有企業恒常地預左筆錢出來自己run社會服務，佢係唯一一間。當然你都可以繼續argue既，佢企業係做塑膠之類（筆者按：即破壞環 境的企業），但如果香港連佢都無埋既，就真係無。
阿野：我就正想點出呢個問題，其實你對今次露宿者世界杯有咩期望，特別係 對球員。係咪真係好似Alex咁講，真係百份之幾搵番野做，抑或幾多人投入生產就足夠？我見英國的露宿者，每人可以拖住隻狗曬下太陽(賣下big issues）咁，似乎係一種生活型態多於社會問題。
廢：我明白你意思。分開兩點黎講：一）對球員個人黎講丫，參與準備今次世 界杯對佢自己確實幫助唔少。好似阿新咁，你可以argue賭博係佢既生活模式，但佢踢波踢上癮，同我地講專心踢波就忘記左好多漏習，以往佢最麻煩問題既，就因為踢波呢個寄託忘記左。又好似阿岡呢類有家庭既露宿者，投入足球令佢態度積極左，對家庭係好事。你話丫，以前真 係連涼都唔沖既，踢左波之後依家都有d紀律，呢d係唔可以deny的影響，至少對佢地自己好。
第二，香港一向將露宿歸咎為就業問題處理，但外國有另一種看法究竟 係，好似英國既Big Issue，呢樣我真係要去到同d人交流下先知。有 d 國家好professional，西班牙請到碧咸幫佢地教波，但好多國家既領 隊都好似我一樣，coach未必淨係教波果隻，係果邊我地每日比賽前都會開coach meeting，到時應該會傾下露宿者社會位置既問題，睇下到左之後我可唔可以寫d野返來比你地丫﹗
傾到呢度，大家都明白這次曙光隊出戰蘇格蘭，唔一定可以為各位同志帶來新氣象。但至少老廢帶著問題去愛丁堡，就跟笑容燦爛的隊員一樣，露出一點曙光。
預告：露宿者世界杯，不是工作咁簡單，請看下集《誰是最大公因數？》
重溫進軍愛丁堡系列：
進軍愛丁堡系列（一）: 備戰露宿者世界杯
進軍愛丁堡系列(二): 拉雜成軍﹗
如果你覺得這篇文章寫得不錯，或這個網站辦得不錯，請捐款支持我們吧！
This work is licensed under a Creative Commons License