文：小草
香港大部份的基層,唔係睇方向報就睇生果報啦,今周政府公佈[長遠房屋策略], 咁就睇下兩份報紙點講啦。 點知, 兩份報紙都好似避重就輕喎。嗱睇政策新聞，唔想被人老點，就係要睇呢幾樣野：
1) 點解搞到以家咁？（即係邊個要負責？）
2) 以家咁樣邊個最唔掂?需要乜？
3) 果啲統計數字邊到嚟?信得過？
4) 政府唔想做乜?聲稱的困難可信嗎？
5) 政府肯做果啲又益邊個先？
咁睇下兩份所謂基層報紙講左咩先：
1) 點解搞到以家咁？（即係邊個要負責？）
生果報就猛話政府唔做野，又話基層好慘咁，好多團體鬧爆長策。方向報一向自稱基層，咁唔鬧得政府，鬧邊個好呢？哈，方向報對樓市壓基層的慘況一向都採取「凡事賴死人，活人不負責」方法，總之咩衰野都賴貪曾就得啦，現屆政府就好似受害者，仲慘過啲劏房街坊咁。
之但係，兩份都對地產霸權好似無聽過咁！？有錢佬為富不仁搞壟斷以本傷人, 唔洗負責？
2) 以家咁樣邊個最唔掂?需要乜？
呢樣野兩份報紙都唔夠膽話唔係基層啦呱。好多劏房街坊都試過俾人迫遷，瘋狂加租等等，流離失所，又因上班上學要住在某些地區。你話呢啲家庭的細路，仲有咩發展可能呀？
3) 果啲統計數字邊到嚟？信得過？
政府話劏房數字全港得八萬幾喎, 你信唔信呀？方向報就信十足, 生果報仲有個小報導話北區團體估計淨係北區一劏十甚至廿間房都有。
老實啦, 政府數字咪又係人口普查到嚟？以家識少少字的後生仔都好鐘意做人口普查員架, 筍兼職呀嘛。小草的朋友好多都做過, 啲上頭會教: 劏房拍外面大閘無人應果啲就當一戶！！！
大佬，你做普查又時係日頭，人地劏房街坊番哂工啦，夜晚收工咩通告都好少理啦，唔幫你做又唔犯法！
咁你話啦，條數準唔準呀？有無可能得八萬呀？
真係服左啲報紙，呢啲資料你唔去揾唔通手停口停小市民去揾咩？
4) 政府唔想做乜?聲稱的困難可信嗎？
局長張炳良話揾地難，方向報十分同情，生果報話政府所謂揾到的地都疑似篤假數，但兩份都唔提［被消失的］大量政府市區土地儲備，咁咪好似幫政府講到佢真係無法子咁囉！
政府唔肯做租管，話業主怕租金不高不肯租。唓，擺係到唔租咪又係嘥，我就唔信啲人唔租出去。咁點解釋以前有租管時呢個世界咁多租客？大家唔好以數典忘祖，1970-90年代都係有租管的,而這幾十年香港經濟大體上都好好, 教科書成日教細路：「1970年代香港經濟起飛！」
驚業主唔租？唔緊要，學外國咁，課徵物業空置稅囉，咁唔單止可防止囤積推高樓價，也可防止有人故意為抬高市場租金而不放租。
嗱,唔好扣帽子話人共產呀。話哂呢個世界咩權利都會有個限制，例如行為自由不等於可以殺人，例如言論自由不包括誹謗，私產權亦會因政府聲稱為公眾利益而收回，咁點解以人的基本需要（包括住屋）來謀取暴利的權利,竟然可以係無邊無際無界限！？
呢啲野，睇嚟政府唔肯做，報紙就連提都唔想提囉，兩份都無盡到監察權貴的責任。
5) 政府肯做果啲又益邊個先？
以家政府淨係話起多啲屋揾多啲地，仲話要靈活添，咁即係第日做唔到時，又係無人負責啦。
仲話要搞公私營合作的居屋喎，以前搞過啦，長沙灣碧海藍天咪係囉，最後政府一下話唔做，咪又益哂啲地產商變地產項目以市價出售？
又話推高居屋二手市場流轉,咪即係鼓勵人炒樓？
好啦，你話啦，益邊個呀？