文：仍然記得阿媽教做人唔好太刻薄的廢青
年尾流流，方向報竟然話驚香港變成「流浪港」，究竟咩事呀？
翻查一下路政署資料，2012年全香港有1184條行人天橋同隧道，方向報只係「巡查」咗五個地方，夠膽話廢天橋隧道「遍佈全港」，仲話驚香港變成「流浪港」？使唔使咁誇張啊。
然後議員就批評政府部門「任由天橋荒廢」，咁講嘢， 將軍澳啲路點計先？將軍澳街坊日日行商場天橋往返屋企同地鐵，地下行人路影都無個啦，又唔見議員、記者去巡查，然後批評要拆咗條路？連運輸署自己都話，使用率高低唔係唯一考慮嘛。如果真係切實執行「無人用就要拆」，咁好多高官個腦都要拆喎……
方向報一「巡查」到區內有無家者，就話佢地「有瓦遮頭又免交租」。唓，俾著我係無家者，我都唔會選人流多的地方啦，唔怕會被人投訴咩？到時咪又要搬！
方向報都一時一樣。一時係喺標題大大隻字話露宿者是「毒瘤」，需要處理，但喺同一版報導又細細隻字話政府對他們的支援不足。 打完人一身又突然間扮好心呀？
嗱， 心水清的讀者，就要識穿到方向報的語言偽術啦！ 政府社區規劃做得唔好，搞到公共設施無咩人用係一件事；社會資源分配唔好，無家者在社區出現，係另一件事喎。方向報話到自己係一份關心基層的報紙，想講政府規劃問題的話，唔係應該去問下政府幾時會改善咩？有咩理由無頭無尾咁去把責任推向弱勢者身上呀！