恒基地霸李兆基早前捐出屯門藍地地皮福亨村路段，興建安老院舍，合共提供1400個護理及護養宿位。大家或會問，又話官商鄉黑勾結嘅，點會咁好死呢！

昨日（9月13日）屯門區議會討論社署提交的整個興建計劃，大家仔細留意下，或會知更多「官商合作」的端倪。

第一，地皮位於港深西部公路高架橋底，地霸用嚟起樓都搵鬼買搵鬼炒，搵唔到錢就用嚟幫自己漂白，幾好咯；只怕婆婆公公到天台散步時吸入過多汔車排出嘅懸浮粒子啫；

第二，今日社署展示的院舍構圖，外觀內籠堪稱酒店級，好正啊！但社署其實維持資助宿位與自負盈虧宿位六四比，即是說，實際只有八百個資助位；而每年輪候資院院舍三萬多名長者中，都有幾百個等唔到就走咗！

第三，我今日在會內問社署及博愛代表，自負盈虧宿位會否設豪華位？代表咬牙切齒地話宿位對像係普羅大眾，但係實際收幾錢呢？無講。會後有人同我講話大概一萬元啦，綜援加高齡津貼都夠俾啦。哦，你白紙黑字寫低咩，到時要坐地起價可奈你咩何呢？

再者，超雄就同我講過，呢類大型集體式的安老院設計，像監獄像商場，老人家其實唔鍾意，外國早就被摒棄；我哋左翼現時係要推動貼近家居式的安老院舍呀！同意你呀超雄，唉，不過，算啦。

所以呢，唔好聽到地霸捐地起安老院就太興奮。而我哋係要一齊昅實自負盈虧宿位收費，唔好俾佢哋搞到長者們後生時活於階級社會，最後一程都要活响階級院舍。