「主啊，這到幾時為止呢？」「直到城邑荒涼，無人居住，房屋空閒無人，地土極其荒涼。」（以賽亞書 6：11）
今日《明報》揭發，香港聖公會教省秘書長管浩鳴去年9月透過公司股份轉讓方式，買入南區千呎單位，涉嫌避稅$660萬。今年初更帶領聖公會，斥資$7000萬在中區黃金地段及觀塘買入5個單位，聲稱由於中環鐵崗嘅聖保羅堂，其牧宅所在嘅鐵崗5號需要重建，聖保羅堂決定將整座出售予發展商，故需再置業提供牧宅予牧師。
但係本研社成員今日去中區考察，發現中環鐵崗旁邊、位處黃金地段嘅上亞厘畢道，樓高5層、由聖公會擁有嘅萊利樓（Ridley House），部分單位玻璃破爛、露台植物奄奄一息，似乎處於半荒廢狀態多年。
聖公會多番宣稱「買物業做宿舍」，但經查證後發現，萊利樓多年前曾用作宿舍用途，如今荒廢多年，難免令人質疑管浩鳴為何不好好善用空置單位，翻新用作牧宅，偏偏要以宿舍之名，係旁邊嘅堅道買入私樓 ，加劇房屋問題？究竟聖公會係搵宿舍，定搵位炒樓呢？
今次「土地大辯論」，政府完全無處理如何遏止有樓炒樓租疊租嘅投機炒賣，咁政府開拓幾多土地，最終大部分只會落入炒家手上，普羅市民繼續『貴、細、擠』！