尋日跟花花去香港文化博物館嘅粵劇文物館睇野，
聽導賞員講左個好正嘅古仔，
話說華光係玉皇大帝D馬，
有晚佢老細瞓到淋淋淋，
突然俾一D好銀嘈嘅噪音嘈鬼到瞓唔到，
真係無明火起三千丈，
而家幾點呀？
擾人清夢真係冇公德心！！
於是立刻叫華光落去睇吓邊層樓咁夜開PARTY，
叫佢即刻散，
唔係整到佢冇啖好食！！
華光立刻雷霆掃穴行動，
掃到落凡間，
卒之搵到班契弟，
嘩！！
佢地打鑼打鼓，
唔怪得咁嘈喇！！
於是上前問：
「你地整乜呀？三更半夜嘈成咁？」，
個茂利睇睇佢：
「阿SIR，
做大戲唔係唔賴吓話？」，
「做大戲？」華光真係唔賴架，
上面邊有D咁嘅野姐，
就跟住條茂利隻手指望過去，
嘩！！
有個台光撐撐！
十分之七彩！！
上高仲有人行行唱唱，
幾過癮！！
「呢D就係做大戲？」
個茂利昅昅佢：「你邊位呀？」，
華光俾人窒冇問題，
因為D乜鬼大戲真係好好睇，
嘈得好有道理，
快D番上去講俾老細聽先，
分分鐘有官升。
點知番上去報左料，
玉皇大帝邊處理佢乜大戲呀！
「幫我一把火燒左佢！！」，
嚇到華光嗱嗱臨走番出宮，
個心立立亂，
佢諗一把火燒左佢咪以後冇戲睇？
咁唔得嗰噃，
咁人地會話我地冇文化架嘛！！
唔得唔得！！
我一定要保住佢地！！
於是心生一計，
落去同班茂利講：
「大家想生定想死？」，
跟住俾人揼左身！！
好彩後嚟有個老人家識得野，
阻止班茂利濫用暴力，
等華光一五一十講哂出嚟，
班友先至識驚！！
華光講：
「唔使銀怕，
聽我講BABY,
你地放下煙花，
等佢以為我做銀左野就得。」，
咁大戲至逃過一難，
通常民間傳說都有漏洞架喇，
你一定會問第日佢地做大戲唔嘈嘅咩！
唔知喎，
總之華光就咁成為左戲班大恩人，
奉為先師以表尊重。
呢個古仔真係一個優秀公關的成功故事！
不過我嗰日入到去嗰個模擬戲棚，
突然有知覺消退現象，
點知電話震機嚮，
至打斷個急退現象，
搵日再入去，
睇下係咪有料到，
至得。
