圖一：「收皮」應草民音樂節循環製作多張車軚櫈，其後捐贈予藍屋。
＊ ＊ ＊
說來慚愧，筆者誤會良久，以為「紙包飲品」也可以回收。直到某一日，循例將之壓平，放到廢紙回收箱，遭一伯伯用英文阻止，才終於知道真相。
因為「紙包飲品」除了紙，起碼還有兩層膠膜，甚至再加一層鋁箔。必須以特別的工序將其粉碎，使塑膠在水中浮面，紙質沉底，才能循環再造。
香港還未有以上機器，紙包飲品的墳墓只有堆填區。但現在還有另一出路。
＊ ＊ ＊
問：為什麼會成立「收皮」？
Kimi：我係平面設計師，喺觀塘同朋友租工作室已經十年。
周圍有太多「垃圾」可以執，我地習慣好似「神期食品」咁搶救物資。工廈經常拋棄大量物料，乜嘢都有，隨時多到係一間舖嘅存貨，而且完全未用過，我覺得好荒謬。
圖二：Kimi 用哥哥棄置的皮包，改造成水壺袋。
有一日我哥哥唔要皮包，我拆走啲皮，再造成水壺袋（圖二）自用。大概兩年前，我同兩個朋友成立「收皮」，開始搞循環再造。
＊ ＊ ＊
問：為什麼「收皮」會專注於紙包飲品？
Kimi：我亦係「蘇波榮」做過廚師。初時「蘇波榮」仲有賣紙包飲品，霸佔哂垃圾桶嘅空間，於是就諗紙包飲品有冇得搞。
我有朋友叫 Michael，佢剪開紙包飲品對摺，就當銀包嚟用，不過做得好樣衰。我根據佢嘅創意繼續擴展，銀包、散紙包、捲煙袋、斜揹袋，通通都做得到。
圖三：「收皮」的工作間
＊ ＊ ＊
問：你地循環再造了幾多紙包飲品？
Kimi：兩年嚟處理左二千個左右。通常都係朋友將一家人飲剩嘅紙包飲品，洗淨儲好打包畀我。
留意一定要洗。好多人問「要洗嘅咩」？大家都慣左直接掉垃圾，真係吐血。本來牛奶盒都可以收，但唔洗就會好臭，所以唔敢公開呼籲。
＊ ＊ ＊
圖四：「收皮」用棄置紙盒和膠袋，改造成手袋。
問：好多市民－－好尷尬包括自己－－過去都不知紙包飲品不能回收。
Kimi：我諗係名出左事，大家都叫「紙包飲品」，但英文唔係叫 Paper Box，係叫 Tetra Pak。佢同另一間公司 Evergreen Packaging 製造哂世界大部份飲品盒。
即使奶盒同果汁盒冇鋁箔，依然有兩層膠夾住紙，係香港回收唔到。
＊ ＊ ＊
問：只有你們從事回收，會否擔心杯水車薪？香港應否回收紙包飲品？
Kimi：真係要實踐全民回收先掂，我地只能做到 upcycle，要做到 recycle 先係治本。
問題係香港嘅回收冇出路。好多人停留喺廿年前嘅思維，覺得肉酸，唔肯用「垃圾」整出嚟嘅嘢。
圖五：「收皮」用棄置紙盒和膠袋，改造成手袋。
＊ ＊ ＊
問：你認為政府和社會應該怎樣應對？
Kimi：近年愈嚟愈多人醒左，有好好嘅組織出現，比如「執嘢」。同埋教育好緊要，否則就冇反思。畀咁多錢買好貴嘅品牌，係咪真係值呢？
＊ ＊ ＊
問：政府想推行垃圾徵費，你支不支持？
Kimi：絕對贊成用徵費推動分類。好多人自以為對垃圾冇責任，掉落垃圾桶就算。但點樣避免堆填區飽和係大家嘅責任。
問：但香港人一直沒有分類習慣，徵費會否不得其法，甚至有反效果？
Kimi：我覺得用者自付係好事，唔想俾錢咪唔好掟咁多垃圾，為左慳錢始終會做。不過收左啲錢點用就有爭議。
至於膠袋收五毫紙根本冇撚用，大家抱住同跌左冇分別嘅心態，我覺得成效唔大。
圖六：左至右依次為銀包、捲煙包、散紙包、斜揹袋。
＊ ＊ ＊
問：哪裡可以買到你們作品？
Kimi：可以 PM 我地。在何韻詩的 18 種香港，還有士多（Ztore）都有寄賣。
其實唔係好好賣。我地有時都會去市集擺檔，已經自由定價，但師奶同老人家唔係咁欣賞，「垃圾嚟嘅！」
＊ ＊ ＊
後記
與其用「損失框架」，不如用「獲得框架」？
作為左膠，筆者絕對支持以政策改善社會問題。但金錢誘因是否一定湊效？
以色列幼稚園的研究，早為世所津津樂道。罰錢反而令家長誤會，以為是變相購買服務，更加心安理得遲到。
受訪者便點出五毫紙一膠袋的問題。筆者擔心垃圾徵費或生同樣反效果，市民覺得畀左錢就完成責任，繼續大模斯樣掉垃圾，結果枉忽原意，未能改變習慣。
《一切都是誘因的問題》解釋，金錢當然是重要動力，但若看不透真正誘因，或會事倍功半，甚至適得其反。「獲得框架」（正面鼓勵）往往比「損失框架」（負面懲罰）更有效。
舉例，筆者一直奇怪，究竟幾多市民會感激 MTR 的「3% 回贈」（97 折優惠）？幾毫子的微利，根本成不了誘因，也換不到市民肯定。
若筆者是 MTR 高層，就寧願將預算集中，每天隨機抽五百乘客，贈送一百元增值。這樣才是有效的「獲得框架」，讓乘客真的感到有利可圖，行為上有正向反饋，有動力乘搭港鐵，爭取獲利機會。
同理，垃圾徵費不宜只用「損失框架」。政府應該建立一個機制，獎勵到垃圾量少、願意分類的家庭。如是才能移風易俗，低下階層同蒙其利。