禽流感狂想曲之三:雞毛
唔知幾時開始，天空變成墨綠色，好似雞屎咁，佢地話係大氣層受到北方的沙塵暴污染喎。呢輪一朝四、五點就自動自覺咁起身，鬼咁準時，到太陽出黎既時份，反而又開始眼瞓，搞到上課時烏下烏下咁，心理醫生話，呢個係經濟唔好負資產造成既壓力大喎。我又冇負資產．．．
不過最近真係有D怪，成鬼日見到雞毛，去茶餐廳食早餐，係個豬排包度竟然夾住條雞毛，哇，個餐廳伙記幾惡呀，明明有條雞毛，佢仲敢話唔係佢地既，話禽流感之後佢地無賣雞。雖然佢地D餐牌真係無雞，但一定係廚房有問題，惡人我見得多，但真係無見過咁蠻不講理既人，佢竟然話D雞毛係我帶去既，好心啦，比個好小小既理由我好唔好？算數，堂堂讀書人，唔同佢拗。
東家唔食咪食西家囉，你驚我會餓死？反正依家漢堡包平通街，我平時鐘意佢地杯奶茶之嘛。講都唔信，竟然連麥記裡面既包都夾住條雞毛，估唔到香港食市既衛生搞到咁差，唔怪得遊客都唔黎啦，無得怨。我費事同D職員嘈，反正佢地都唔係話事人，下次食野小心D檢查清楚囉，只係估唔到佢地會變本加厲，最初只係包夾雞毛，之後竟然係杯橙汁度浮下浮下咁！我都唔明點解冇其他人投訴。不過講返轉頭又好難怪佢地既，最近成日有雞毛係街度飛下飛下，飛左入餐廳都唔定，反正食唔壞人就算啦。
可能唔覺唔覺食左好多雞毛，最近每次大便都會痾一兩條出黎，痾左出黎都好，起碼唔會積係腸胃裡面，不過我懷疑我最近乘日痾爛屎，係同食得太多雞毛有關。話時話，最近好似好奈無食雞，可能食雞毛多咗，見到雞肉覺得好嘔心，反正多食菜比較健康，電視都係咁講啦，況且又有禽流感．．．上次睇電視見到政府殺雞，唔知點解，搞到自己成身冒汗，夜晚仲發惡夢添，下次都係唔睇。
我估自己身體真係好好，食食埋埋咁多雞毛都無事，唔好講話禽流感，傷風都無，腸胃仲好似好左添。初初真係幾驚架，一見到雞毛，成身雞皮疙瘩都走哂出黎，依家見怪不怪，有時梳頭夾著幾條雞毛我都唔多緊張，我依家仲專登空兩個櫃桶出黎放雞毛添，一個放粗，一個放幼，雞毛其實幾有用，可以造雞毛掃啦、踺啦、枕頭啦，又可以將佢染色變成圍巾或帽子，我最近真係好鐘意雞毛既圍巾同帽，佢地既好處係冬暖夏涼，最岩香港天氣。
我先頭以為剩係自己會鐘意雞毛，後來發覺原來好多人都鐘意，明星阿飛就紋了雞毛的標誌係手臂，幾型呀，如果唔駛教書，我都紋番條。有一次我係地鐵見到個靚女，睇真D，佢D眼睫毛原來係好細好細既雞毛黎架，唔怪得咁濃密啦，我唸遲D市場好番都要轉番份可以扮得in啲既工。
成兩三個月，每日都四、五點鐘瞓醒，索性起身到公園晨運，不過天空仲係雞屎咁色，我忍唔住向天空大叫，換來重重回音，太陽終於係墨綠色的雲層中冒出來，於是我日復一日地叫。