我記得當時我響金鐘搭巴士返屋企，經過黃埔見到學民街站比警察比人圍住，我二話不說落車到場了解一下。
當其時我見到佢地一個個居民不斷地指罵學民街站既義工，其中我見到有一個帶眼鏡，應該係為人父親既男人當其時佢係拖住一個兩三歲大既小朋友，佢大聲用粗口指罵街站工。
我響呢個街站只係逗留左一陣，已經好大壓力，我真心佩服一班面對住指罵咁耐既義工。
之後我稍然離開後，突然比一名嬸嬸拉住，或者因為我身上帶住黃絲帶，佢開始指罵我。佢話我比人洗腦，叫我食屎，叫我返屋企訓，而且中途好多途人加入指罵。我嘗試同佢地去理論，但我想唔到佢地可以覺得梁振英、以及共產黨管治下係冇問題。之後理論途中，有另一位支持我既姨姨幫助我，帶我遠離果班人群。
整件事我相信只係冰山一角，我知道有好多同路人都遇過呢種情況，而且我已經唔係第一次遇過，即使響旺角、金鐘道既時候我都遇過。今次反而令我記返起當初果種感覺，係好難受，但更加清楚明白到點解我要堅持落去。
要老一輩既市民政治醒覺，真係好難，難度可能比堅持佔領來得難十倍一百倍又多，但我相信學民同埋其他街站做既野並唔係冇用。就算成效不大都好，我地都要去支持，救得一個得一個。
今日佢地在外做既係，增加支持既人數，作為金旺銅既佔領人士，在內更加唔能夠再內鬥，一定要盡快討論到共識採取進一步行動。雨傘行動，一定要繼續落去，要比呢個政府睇到香港人既決心同意志並唔係三分鐘熱度。