看完香港01 二月九日出的評論，我覺得每一個真心希望香港有自由民主的人，都應該警惕呢個媒體。不是因其有中資背景，而是因其在此次旺角事件的評論中所透露出的政治立場與意圖。
香港01近來一直以客觀中立、關注民生的形象為自己在媒體光譜中定位。旺角魚蛋事件發生前，尤可見其關於流動小販不畏打壓的報導。然而事件之後的這篇觀點文章，其主旨可以總結為：旺角事件是暴力事件毋需再討論；你同情、理解示威者或者指責警方開槍，你無恥你扭曲你走火入魔；你指責CY，你就是和港豬一樣無知、看不清香港問題所在；所以選哪邊站你們這些知識份子、泛民主人士可要想清楚了。
問題是真有人認為千錯萬錯都只是CY一男子的錯？口號這麼叫不單止因為他的確「乞人憎」，還因為他代表香港地名義上的最高行政權力，而且是中央權力侵蝕香港高度自治的代理人。作為一個關注開社會民生議題的媒體，香港01會連呢點都唔知道？會真的認為對民主自由有訴求的港人覺得只要剷除CY就有真普選？所以當香港01講人們將一切問題歸咎於CY而忽略真正問題，如果唔係因為佢特登偷換概念，就係因為佢蠢到一個點⋯⋯而我唔覺得一個識潛伏的媒體會係蠢。
黨報口吻有一種居高臨下的風格，而且討論任何問題都帶有迫讀者選邊邊企的意圖。呢種迫人選邊企的方式並唔係同你講，你唔點點點就落地獄之類。而係讓你隱隱覺得自己選錯邊就會同真理、同道德、同大多數民眾成為對立，輿論壓力同大眾異樣的眼光等緊你。
大家如果對黨報的行文風格唔熟悉，可直接睇返香港01篇文最後一段，就會發現其口吻與黨報何其相似，意圖何其明顯。
當佢寫下「反對派是否應該將焦點放到特首個人身上」，你覺得佢係企喺邊個立場上咁寫，同埋佢覺得咩人係「反對派」？唔係講緊勇武抗爭的人咩？唔係講緊同情抗爭者的人咩？點解就突然出現個「反對派」？而且仲要暗示「反對派」的特徵係鬧梁振英。
我另選取兩張環球時報的文章截圖，如不考慮簡繁體字的差異，你真係分到邊份係環時邊份係香港01？
佢篇文係迫緊知識分子同所有泛民主人士去同較為激進的陣營劃清界線，不允許有同情理解辯護的空間，只可以貢獻你的聲討，否則你就係失去客觀理性，被當成主張暴力且無知的一份子被貼上標籤。唔好以為呢招冇用，唔好低估人，尤其係知識份子，對道德、理性、正確光環的迷戀。