我諗呢一刻，唔少人都會生起一個念頭。過去十幾日竭盡全力，但好似乜都換唔到，已經好攰好無力……
但係，傻啦。
唔駛覺得無力㗎。
雖則對手輿論手段越嚟越狠毒，雖則部分市民仲未瞭解運動嘅意義，雖則我哋試過嘅方法都仲未迫到政府回應訴求……但請大家毋須妄自菲薄。過去十幾日，你哋已經好叻，已經做得非常出色㗎喇。
講吓自己先，我只係個好普通嘅香港人。唔知你係咪咁，過去幾年我就一度好討厭呢座城市，因為我心痛佢經已面目全非。人與人關係疏離，街上嘅臉孔睇落灰灰暗暗，網上討論動不動就反面起底欺凌圍剿。香港人看似好討厭──好大怨氣，不存在聆聽、信任彼此嘅空間，每日暈暈噩噩呆呆滯滯，過得好壓抑好唔開心。唔知幾時起，香港變得好麻木、冷漠、缺乏同理心，連散播希望都顯得自欺欺人。佢何止係生病咁簡單，其實已經係絕症末期喇。
隨住班離曬地嘅所謂父母官打算強推惡法，將香港僅餘嘅自由都要勒死，我諗好多人都同我一樣，慨歎香港今次可能真係玩完——又唔忍心講出口，有邊個諗到平生之年會見到呢一幕？對住咁無恥嘅一群戲子，香港人心底裡在不甘在流淚，但其實我哋又可以點啊？記得69遊行有記者問市民會唔會移民，佢激動咁答「呢度係我屋企，點解唔喺佢哋走，而係要迫我哋走啊？」
103萬人震攝唔到佢哋，仲要被狠狠摑咗一巴。好似......已經冇還擊之力。
但係，我要向在座各位誠懇道歉。我嚴重低估咗香港人，可愛嘅程度。
鎮壓當日，我並唔在場。我望住槍林彈雨嘅畫面，示威者嗆聲吞淚，因躲避毆打、烽煙而節節後退。但據聞當時好幾個人大喊「唔好走啊，我哋係香港人嚟㗎」之類嘅說話，唔少人最後都行返轉頭，面對一支支警棍、一個個槍口，死撐用雨遮架起防線……我睇到呢一幕幕，頭腦頓時一片空白，因為情感已經麻木咗幾年，實在好難習慣。然後攬住身邊嗰個人，好唔客氣咁喊到停唔到，成個傻西咁。
唔係因為個政府仆街，唔係因為個情況絕望——呢啲我哋都慣咗㗎喇，唔係咩？
而係我嘅心靈被撼動咗，因為眼前係我好熟悉嘅香港。我呢刻睇到嘅係一班香港人，佢哋被警棍毆打、被催淚彈灼傷、被子彈沖塌淚腺。佢哋好害怕好徬徨，但係仍然掏盡卑微嘅勇氣，努力守護呢個苟延殘喘嘅屋企。我見到一位患癌爸爸企前線中咗子彈，一位媽媽為咗孩子擋住一把把槍，一班學生守望相助共同進退，一群牧師修女企前線保護學生……鎮壓當夜我睇住直播，中環街上嘅人絡繹不絕，唔忍心退落嚟，「我哋一走，香港就冇㗎喇」，佢哋咁樣講。當晚有消息指保皇黨坐車返咗立法會準備強行二讀，仲有人好激動咁話「hi，我哋快啲返去金鐘啊，趕唔徹喇」。街上嘅人一路聲嘶力竭咁嗌「撤回、撤回、撤回」，一路設法用雨遮去擋……催淚彈？子彈？水砲車？點樣擋？擋到啲咩？
當日，好多父母、長輩都喊到停唔到，佢哋未必完全理解惡法嘅威脅，未必完全認同學生嘅抗爭手法，但佢哋為香港嘅一班仔女感到內疚、心酸。及後616遊行200萬1人，人數創咗歷史新高，正正係因為有呢班父母，唔忍心學生孤立無援嘅父母。
嗰位扮抗爭者、企圖分化兩代人嘅金毛90後，我幾肯定佢冇去616遊行，先會照劇本讀話父母唔愛仔女，都可以唔打冷震。
當日我見到一位年邁嘅傷殘婆婆，佢一臉疲倦，輪椅後面個筲箕放咗一支Bonaqua水，同埋一張「撤回惡法，學生無罪」嘅紙牌。我遇到一位洗手間清潔伯伯，佢一路拖地一路同我講加油，話呢個政府不知所謂，發聲都唔係太清楚。我認識一位剛剛做完大手術嘅中年女士，佢平時連落街行一個圈都會喘氣，但嗰日佢由炮台山行到去灣仔，行咗7個鐘，最尾真係頂唔順要休息。
嗯，佢哋都上咗年紀喇，已經滿頭白髮，體力上未必負荷到每一次嘅行動，只能盡量參加溫和嘅遊行等等。可能大家覺得遊行作用唔大，但其實佢哋真係好畀心機，嘗試表達對呢班年輕人嘅愛護，就好似我哋對呢個地方嘅情感一樣。
香港人，並唔討厭。只係社會太扭曲瘋癲，返工架車上唔到，另外一架車又上唔到，個政府又一巴巴車埋嚟，先令我哋冇咗喘息嘅空間，冇能力顧及彼此，生活如此壓抑。但係我哋必須知道，香港人，其實真係好愛好愛呢個地方。睇嚟從來從來冇變過。
你會問，我講咗咁耐，咁我哋有冇贏到吖？
冇啊，我哋連階段性勝利都講唔上。政府繼續忽視問題癥結，反而藉散播仇恨挑起對立，透過卑鄙手法分化我哋，透過壟斷式統戰工具捏造事實，接落嚟戰況只會越嚟越嚴峻。我哋的確冇鬆懈嘅本錢。
但我好心痛大家嘅無力、自責啊。
試諗諗，如果唔係大家咁努力走出嚟──香港已經喺一星期前死咗喇。因為惡法已經被強行通過咗，我哋嘅屋企已經返魂乏術。經濟社會文化會層疊式崩潰，嗰班人渣鋪好曬後路離開，剩低準備走同走唔到嘅人，香港人自此冇得唔死心。冇錯，暫緩並唔係撤回，但你哋其實已經救咗呢個地方一次，給予咗香港人守護家園嘅空間。
呢場運動揭露咗制度腐敗不堪嘅一面。如果呢刻改變唔到個制度，我哋可以難過、悲憤，但容我請求你唔好自責、灰心──唔需要㗎。要將香港從病入膏肓中拯救返嚟，係需要好長嘅時間。
對住咁恐怖蠻橫嘅獨裁機器，我哋扭轉到局勢其實係好唔簡單，全世界都已經被我哋所震撼。而且我哋仲喚醒咗好多好多嘅香港人，重燃咗對呢個地方嘅盼望、關愛，令好多人願意相信香港未玩完──仲有可能變得更好。
運動期間，我認識一位小妹妹，佢偷偷哋自己喊。佢話唔想睇住香港死，佢知道要做啲嘢，但佢覺得好似做乜都冇用咁，好有罪咎感。我同佢講，如果有日太陽要跌落嚟，你博盡全力都抵擋唔住，係咪真係需要自責呢。世界太大，並唔係所有嘢都係我哋掌控到，但只要覺得正確嘅事，就放心去做啦。至少我哋做返一個人，有血有肉，有情有愛，有你有我。你話係唔係啊？
我住咗喺香港呢個家二十幾年喇。細個嘅時候，父母、學校、傳媒都話香港係一棟好靚嘅屋仔；宜家佢可能又漏水又入沙，變得殘殘舊舊，蓉蓉爛爛。我哋屋企都幾多討人厭嘅地方㗎，不過冇計啦，呢度又真係我哋屋企啊嘛。
就算宜家太陽要夾硬跌落嚟，我都想喺度誠邀各位，一齊拼命守護住呢頭家。我哋贏就一齊贏，輸就一齊輸。
連登巴絲，多謝你哋日以繼夜諗辦法，重燃呢個地方嘅希望。
各位義士，多謝你哋冒住生命危險，捨身守護呢個屋企。
司機車長，多謝你哋體諒抗爭造成嘅不便，仲為我哋打氣。
老師社工，多謝你哋冇捨棄學生，盡曬力保護佢哋嘅安全。
記者朋友，多謝你哋盡忠職守，堅持盡力報道運動嘅真相。
醫生護士，多謝你哋承受咁大壓力，默默治療受傷嘅手足。
創作者們，多謝你哋廢寢忘食，觸動更多市民企喺雞蛋呢邊。
爸爸媽媽，多謝你哋企出嚟保護仔女，仲叫我哋飲多啲水。
香港人們，多謝你哋仲係我熟悉嘅香港人。
呢個家好渺小，但至少容得下一群可愛如斯嘅屋企人。
對手一直散播緊仇恨，但仇恨終會招致厭惡。我哋應該逆其道而行，就等大家一齊將希望、溫柔散播開去。
多謝每一位屋企人。大家記得飲多啲水，好好照顧自己。我哋仲有漫漫長路要一齊行。加油。