作為一個西環成長嘅麻甩佬，對西環有一定感情，亦對警察有特殊感受，作為70後，我細路仔仍然聽到「好仔唔當差」說法，亦因為ICAC成立，警察形象越黎越好，我地十幾歲時會笑老一輩有「好仔唔當差」嘅說法。
我相信我輩細路一定聽過阿爸阿媽講，你再唔聽話就叫警察叔叔拉你！ 從小就教我地唔聽話就要比警察拉，對警察確實又敬又畏，但係再大DD又發覺警察叔叔又唔係衰人喎，至少我走失係街喊會有警察叔叔幫我。
眨眼又十幾歲，當時TVB有「新紮師兄」，覺得考警察好勁！體能又好，人品又好，梁朝偉做張偉傑都溝到張曼玉咁樣嘅穎芝，而且只要努力就有上進機會，張Sir 好快就有宿舍，過多幾輯仲由散仔升到到督察！連穿梭機女神曾華倩都娶埋做老婆，警察形象好到爆燈！我都想過會考完就去考警察！做男子漢唔洗睇男子漢！
一直到回歸前，香港警隊是香港人驕傲，專業廉潔形象好，PC靚仔，督察有型，飛虎勁爆，任何遊行示威警察都盡忠職守，亦唔會選擇性執法，當時公僕呢個名詞受港人尊重尊敬…… 莫講好仔唔當差，搵老公都要搵警察！
點知近幾年香港赤化，警察公安化，由旺角警署強姦女報案人，叫雞警司，以權謀私，但仍然未去到最差，警隊中人亦對公安稱呼好反感，還記得自己係一個執法者！
我輩成長，身邊一定有親人、朋友、同學等成為警察，警察其實同我地好貼近。從未想過到2014年，連自己從小對警察少少希望同尊重都幻滅。
由愛港力青關協等暴力團體開始，到李慧思老師事件，再到六十幾日前由佔中引發的佔領行動雨傘革命，警察選擇性執法，對市民拳打腳踢，可以揚言男殺女姦，可以混入人群滋事，可以主動挑釁市民，可以戴著藍絲帶執法……等等等等…呢一班人仲可以稱為公僕？仲可以稱為警察？根本就係公安城管！！
我理解有人會話我偏激，但係事實擺在眼前，只需要對照自己良心便有答案，我想唔到理由幫差人辯護。 若果硬要一個理由去解釋點解而家嘅我咁厭惡警察，可能係恨鐵不成鋼，我從小就算唔係傾慕都信任左你地幾十年，而家點樣再面對你地？點解我而家係街上見到警察要擔驚受怕？原因係你地唔再係警察！