（獨媒特約報導）編按：郭永健8月19日大埔區議會社區重點項目工作小組首輪發言（稍為編輯以方便閱讀）以及民建聯林泉炮轟郭的對話，相關報導另看：〈林村擬建「天安門」 郭永健提撤回遭建制派圍攻〉。
郭永健：「大家好，作為一個新委員，我對社區重點項目同林村廣場其實都有唔少意見既。
首先我就覺得個（社區重點項目）諮詢非常之倉卒，睇返係個零月（2013年1月至3月）就拍左板話搞呢2個項目，就講左果一億元係點使啦，當中就只係搞過一場地區活動（2013年4月18日）咁多姐。其實宣傳都好似唔係咁足夠既，包括大埔區入面的橫額有冇宣傳過呢個項目呢？
講返設計方案本身，大家都知道和原設計有太大出入啦，相比於2014年申請計劃書果度，有提過話樹屋、度假屋等等，咁宜家個方案主要就係個舞台。申請計劃書入面，4個目標，第1點、第2點、同埋第4點都係講返話要有個度假屋，點樣化為正能量呀，將創意化為現實咁。第4點就話許願廣場加入「嶄新元素」，咁就自付盈虧持續發展。但宜家就淨係得個舞台設計左出黎，究竟係米一個「嶄新元素」、係米可以吸引多D遊客去黎呢？呢個我覺得係要去重新審視返成個PROJECT既。因為原先好巴閉咁樣話有樹屋、渡假屋咁。宜家就得返個舞台，咁我就唔會特登走入黎睇個舞台既講真。
第3點就係關於個舞台啦，有D委員都話有個舞台都好呀，咁但係我地又會問啦，每年都有盂蘭盛會、天后誕呀等等咁多既中式盛事，點解我地又唔喺宜家既足球場搭返個永久舞台出黎，等大家唔使年年都拆、拆完又搭咁樣。咁個問題就係使用率，林村果度大家都知道個交通唔係咁方便啦，如果你話整個永久舞台比佢，即係用成2千幾萬去整，究竟個舞台使用率的評估又係點呢？呢個係第一個問題~ 邊個去搞音樂會，或者係宣傳活動呢？其實大埔係米會有更多的地點去搞，比林村更加方便呢？而其實如果真係要係林村果度搞返個林村音樂會，或者其他大型活動，到時比返個小舞台或者有一個類似搭棚的形式就已經可以做到個效果，就唔使用2千幾萬去搞個永久舞台。
睇返個2014年計劃書，或者大家可以去睇下個計劃書，即係睇下可以扔左佢唔使理（按：2014年舊計劃書）定有小小參考價值啦咁。咁計劃書活動裏面呢，其實好多野都唔需要用果個舞台架嘛 ~ 你搞鄉村市集、美食節，許願節可能有關啦，但你話搞鄉村市集其實都唔需要用到個舞台啦。至於你話之後果D社區活動，例如國慶呀、新春活動呀、音樂會咁等等，其實果個預計的活動數量有幾多？即係去合理化永久舞台的需要。
而第4點，即係關於果個固定攤檔，我明白既，即係想有個墟市、或者想有D有特色既野去吸引旅客，咁無可厚非啦，但問題係：又係米一定要係固定呢？可以睇到如文化中心，即係尖沙咀果度，都有D攤檔賣F藝術呀、手作仔咁樣，果D都唔係固定架wo，比如都係整下張枱、整個架出黎，咁禮拜六日就比D遊客去睇下咁擺係度。其實我地林村入面係星期一至七都係有咁多人黎呀，定係禮拜六日甚至可能大時大節先會有人呢？咁如果你整個固定攤檔，咁D檔主一至五都唔係度賣野既，淨係禮拜六日黎，或者甚至係大時大節先黎，其實係米一個浪費呢？其實話搞墟市既話，我地係足球場果度，好似年宵咁樣，即係間返5至6行出黎，即32個都整得到架wo。而第6點果度，即係林村果度，其實我地話要增加個配套或者我地話要增加多D人去林村呢，其實係米淨係個硬件配套呢？如果係個硬件配套，呢D咁既硬件配套係米已經做到果個目的呢？
林村我都有去過既，去到即係見到棵膠樹啦，其實個範圍內有些想去既地方都去唔到，包括個村校，都有相當特色同本土文化歷史，但就長期鎖住左度門，想入去都去唔到。但如果講一D軟件上既野，包括附近有個林村瀑布（梧桐寨瀑布）、嘉道理農場等，咁我地其實係米可以加返多D既指示牌，甚至係多D介紹，就將佢作為一個整體咁，話比人聽黎林村除左黎扔一個「橙」之外，可以去下呢D地方去認識下D村既歷史，好似林村的客家人，即係佢地生活既歷史文化等等。所以我覺得林村果個許願廣場要從呢啲軟件着手。
最後就係，我地都見到果個設計方案的落差係非常之大，即第一就係個經費的問題，第二就係個設計的問題，咁其實已經係達唔到個計劃的目的。我地區議員係米要堅持，由呢個項目繼續落去呢？據我所知果一億元就冇話今年的12 月31號，即係會期完左就唔可以用既，可以下一年的區議會都繼續使用，唔可以話為使而使既。頭先講到大埔官中其實都爭三百萬，係需要去募捐和籌錢，其實我地係米可以考慮。。既然兩個都爭錢，唔係好夠錢，咁係米應該專注去做好其中一個項目會更加恰當呢？
就算我地唔話擺D錢去大埔官中，其實慳返呢幾千萬，可以有更好的用途架wo。例如葵青區果度，佢地搞果個加強社區健康的服務，如果我地當三四千萬黎睇呢，其實已經可以去到幾千次的洗牙服務、千幾次的眼科診症等等比到區內的長者。
咁所以如果諗返即係大埔區的街坊，首先有幾多人係聽過呢個服務啦，我地粗略的調查係大概一半的人知道姐，知道既入面有幾多係贊成呢，贊成既人可能係佔唔夠一成，咁如果問佢地話呢幾千萬你地會點使呢，如果比佢地揀，即係區內的公公婆婆去洗牙又好，又或者去睇白內障既眼科做手術又好，都好過使係林村果個舞台，即係講咁多其實都係個舞台咋嘛。你話可能泊車果D位既，我明白，可能D居民都有需求啦，咁但係個泊車位……一個交通問題係米可以作另行討論呢？我睇返文件，林泉先生都有提到不如在廣福邨對開整個泊車中心作為重點項目，當時大家就覺得呢D好實際既需要其實可以喺其他地方去討論，所以你話要加多百幾個泊車位，我地都可以係其他場合再討論。我地個立場同睇法係咁樣，所以大家可以再諗諗成個許願廣場設施的配套係米要繼續落去。」
林泉：「我好可惜見到郭永健議員你只係做左4個星期……都唔夠4個星期的議員就能夠提出一個觀點、一個動議，話要將我地廿幾位議員係咁耐時間裏面，經過咁嚴肅咁多的議程裏面探討出來的一個方案……顧問公司咁認真用左咁多資源去做出來的一個方案，你話扔左佢定放埋一邊，如果要扔左佢就扔左你先! 唔係扔左呢個方案，你點可以咁樣侮辱我地咁耐已來的呢個決定、呢個方案呢？呢個係對我地咁多位議員咁耐時間而做出來的成果的一個侮辱! 如果比你做多4年，咩都唔使做架啦大埔! 淨係一個反對……反對就好容易既，建設呢就經過好長時間去做出來的。破壞就講咁容易呀，話唔做，一個經過咁長時間去做出來的方案，呢個係一個社區的需要，你話有冇更好的地方，更方便的地方。嘩，你提出來啦你如果覺得有，呢個係一個可以容納幾百圍、成千圍的聚會地方，你唔好講埋D模棱兩可……拿我繼續講，主席唔該你唔好打斷我先呀。」
郭永健：「主席會唔會可以......我是民選出來的......」
林泉：「拿唔該你比我講埋先好冇！按議會規則……主席……拿我未講完。你可以咁樣插嘴架咩！你識唔識架你呀，你舉手呀嘛講野。」
郭永健：「我頭先舉左手架啦，我有會議常規想問……」
林泉：「舉手？！我講完啦咩，我都未講完，你講咩呀。」
主席：「繼續發言唔該。」
林泉：「拿，主席，係米我講完佢先准講先。佢可以咁樣打斷我架咩？」
郭永健：「咁我對個會議規則有疑問，你繼續係度講，話扔左我，又殺左我咁……」
林泉：「沒人講殺左你WO，係咪你自己講殺左你自己WO，拿呢D叫欲加之罪，何患無辭。呢個係你自己扣帽，你扣帽子扣得好叻囉。咩又扔左你，又殺左你，你頭先話扔左人地個方案呀嘛，岩唔岩呀~我地經過咁長時間討論、探討的方案，你話扔左佢？！唔係下嘛，你做左幾個星期議員，你咁樣講……唔係，我宜家係針對佢頭先個概念，我表達我的意見。比你做多幾年，大埔咩都唔使做啦，你真係。講埋講埋……我未講完WO~咁我就覺得呢個方案有可取之處，亦都係社區的需要，我覺得要做，唔係話三言兩語講話，人地做左咁耐的成果，一下子話要扔埋一邊WO，呢個係極大的侮辱啦。要扔就扔你啦，就係咁簡單！」