又係「唔得老黎講舊屎」嘅時間……
古時，我係讀一間好保守嘅學校，有一年，我諗係修女忽發其想，見到同學仔條條頸巾都太時尚，於是乎，佢就傳令落去，所有junior form嘅needlework堂加插一個環節，全民織頸巾，所有同學仔都要織一條頸巾，而冬天亦只可以戴自己織個條巾，如果唔係，就唔準戴頸巾。
個期大家都化身花木蘭，個個都「織織復織織」，而我呢D 同「賢良淑德」有緣冇份嘅人，當然係開左個頭之後，外判比阿媽織。阿媽當然係電動織頸巾咁嘅速度完成任務啦。
但呢個世界並唔係人人屋企都有個「電動木蘭」嘅，其中有個同學仔冇人幫手，又交貨在即。於是乎，佢就使出神技，佢首先將條巾嘅一頭一尾都找野壓住，條巾嘅中間位懸浮，再擺左個啞呤係中間位，過左一晚，條巾由30cm 扯到變3M。順利過到needlework老師嘅QC審查。
個年嘅冬天，大家就真係戴返自己織個條巾，其實都幾暖。但另一邊廂，3M 同學根本就唔夠暖，因為佢個條巾實際係由30cm扯出黎，好疏風。
雖然呢個唔係寓言故事，但係呢件事上我真心明白，暫時解決危機並唔代表一勞永逸。今日你未仆街，並唔代表可以逃得過總有一日仆街嘅命運。
佔中已經過左一個月，不停有人出黎講，要盡早解決當前嘅危機，回復返正常嘅生活。我成日諗，你班友仔真係個個都係3M 同學黎架，比你勸到個個諸神歸位，齊齊返歸，亦唔代表最最根本嘅民主要求實踐左，唔好自欺欺人，正視問題啦。
後話 之 點解冇啦啦諗起3M同學……
尋晚我係金鐘，有個有心人織左好多好多「黃雨傘心口針」，沿路派比人，我就好順手的接左個，朋友仔都接左個。當時，我諗，嘩，真係好認真，頸巾長條型，我都可以織到變平行四邊型，一把遮都比你織到出黎，真係巧奪天工。當我想好認真咁多謝佢嘅時候，佢就消失天與地啦。
PS. 如果有朋友仔識「黃雨傘心口針」個個高人，可唔可以tag 佢入黎，好想兜口兜面再多謝你一次，「真係神乎奇技，非常感謝您」。從來就有好多傻傻地嘅人sss，都唔知點解會傻傻地咁付出咁多，但就係因為你傻傻地，唔著利工民，都令我覺得「這個冬天不太冷」。