文：小滿
前言：
葵芳有個地方，對比香港很多地方是一個異域，這裡同時進行：
1）組織基層婦女、新移民
在許多爭取民主的遊行示威中，都會見到互幼同工連同基層婦女、新移民街坊一同上街，為香港未來出一分力。
2）社區經濟運行
回收舊布料，按客人喜好訂製獨一無二貨物（散子包、床單、背包、化妝袋等）車衣隊由基層婦女組成，一展所長。
3）兒童社會教育
互幼的兒童工作讓小朋友在學校、課本以外，以不同形式、活動接觸社區、參與社會，例如結合通識元素的小記者、畫班等活動。
4）性別議題落區
同性戀、跨性別等議題在大學的講堂容易接觸，基層社區又有相應的基本認識和教育宣傳嗎？這裡有同工親身向街坊講解、討論。
一些戰友俗稱這個地方「互幼」，它是街工的其中一個部分，自去年發生「街工勞工組事件」、「天晴事件」後，這個中心的同工終於也選擇離開「街工」這個「忘了初衷」的團體。
勞工組將以一系列回顧，記下「互幼」的真實，也讓有志拓展基層社區工作的朋友可以有參考模式與經驗分享，不用由零開始。
記住互幼系列（第一篇）
媽媽在社區生活圈一直為反送中青年講說話
文：小滿
今日有個姊妹嬲爆咁黎到中心，話頂唔順d人係咁暴徒前暴徒後咁話d年輕人，然後，佢講咗好多佢嘅睇法，同埋哩排遇到對哩場運動有唔同睇法嘅人嘅經歷。
「我去上太極班呀，十個有九個都係支持年輕人嘅，連個阿sir 都撐，佢話佢612果日都喺金鐘，好和平咁集會，但係警察無啦啦咁放催淚彈，仲話係暴動，有冇搞錯！」
「有個阿叔就話，佢哋放火燒嘢呀！暴徒黎架！咁我同佢講，佢哋有冇燒死人丫？有冇燒你間屋丫？你諗下，一百萬人走出黎政府唔理，二百萬人走出黎佢都唔理，如果政府唔係咁，如果警察唔係咁，班人點會要將武力升級？」
「我覺得d年輕人真係好好，好無私。佢哋為乜唧？佢哋唔係為自己，係為咗成個香港。個社會真係好唔公平，白衫打人冇事，轉個頭就放番，警察打人都冇事，仲有糧出，班年輕人呢？一拉咗過一兩日就話要提堂，要告暴動罪，咁就冇咗十年。」
「妖有個阿伯話，你嘈咩唧，林鄭係選出黎家嘛！我話，你都痴嘅，你有份選咩？我又有份選咩？全香港得1200人有權選架咋！」
佢講得好好，亦做得好好，佢一直喺社區喺佢嘅生活圈度去講自己嘅睇法；佢唔會同人硬碰，但佢更加唔會默不作聲。
我識佢果陣，佢係一個新移民，一個單親媽媽。