8.17和平普選大遊行今個星期日就係喇，反佔中大聯盟昨日誓師，仲話估計遊行人數肯肯定超過7.1大遊行。八方依幾日都八緊個遊行有幾勁，八一八下就搵到香港印刷業商會係佢個官方網頁發出既「8.17和平普選大遊行」通告，除咗呼籲各商會同事為「維護香港法治與繁榮安定站出來支持遊行」，碌到下面就見到份「大遊行口號參考」，幾搞笑，同大家分享下。
八方一睇商會的口號參考，都覺得幾搞笑。八方幫堆口號分左做四大類，分別係創意類、攻擊類、老土類，及九唔搭八類。
「九唔搭八」嘅冠軍，八方就覺得係「我們『沉默大多數』來了」呢句口號，話得係「沉默大多數」，仲嗌口號！？有句更加以子之矛攻子之盾，「用愛與和平，反對佔中」，喎！仲有句係「愛護香港 你我有責」，原句出處應該係「清潔香港」，哈哈。「香港係福地 不要被『玩謝』」呢句就唔夠順口囉。
九唔搭八類：
- 我們「沉默大多數」來了
- 「沉默大多數」站起來
- 用愛與和平，反對佔中
- 愛護香港 你我有責
- 香港係福地 不要被「玩謝」
- 全家一齊出 普選一定得
- 和平佔中係假象 爭取普選是理想
八方都睇到有啲幾有創意嘅，值得讚下。有句就話「老老實實 佔中為乜」八方就覺得幾好，「理直何須暴力 氣壯就是和平」都幾順口，「衛我城 要和平」就係借左民間公投首歌，「講起佔中我就興」、鬧去佔中既人「傻仔」都夠 layman，八方都幾鍾意。
創意類：
- 老老實實 佔中為乜
- 理直何須暴力 氣壯就是和平
- 衛我城 要和平
- 普選求共識 何解要強迫
- 學生青年勿聽信 講起佔中我就興
- 佔中留案底 照去太傻仔
有啲口號就明顯係攻擊性既，好似直接叫泛民「收檔」，話佔中係「騙局」咁，叫孩子去犯法，話泛民係「黑金政治」，話泛民係「暴力」咁囉。有句就叫市民齊齊「誅」啲佔中人士最夠狠。
攻擊類：
- 佔中人士要反思 市民齊齊來誅之
- 孩子，不能犯法，更不能叫人犯法！
- 孩子，我們向暴力說「不」，向和平說「不」
- 反對黑金政治 守護和平／廉潔香港
- 百萬聲音振香港 泛民佔中要收檔
- 佔中亂港 我們說不
- 向議會暴力說不 還香港和平環境
- 議會暴力 不能容許
- 請尊重我們 勿騎劫民意
- 佔中擾和平 普選難達成
- 佔中騙局 切勿中伏
有啲口號就比較「老土」、穩陣嘅，好似係咁話百萬民意，要「維護法治」、要和平咁。
老土類：
- 爭取普選 機不可失 時不再來
- 維護法治逼在眉睫 刻不容緩
- 保普選 手牽手，泛暴力 心連心
- 愛香港 愛和平 愛普選
- 和平普選路 大家齊創造
- 佔領中環、No No No；依法普選、Yes Yes Yes
- 咪當我老襯 佔中真搵笨
- 香港是我家 和平靠大家
- 佔中毀和諧 我們反對它
- 我要和平選舉 拒絕搞亂香港
- 百萬民意 泛民應該重視
- 百萬市民表心意 佔中人士請注意
- 百萬簽名夠唔夠 為求共識平爭拗
- 正面力量為普選 負面勢力毀家園
- 和平佔中 敲警鐘 反拉布 齊腳步
呢啲口號其實都有列明創作口號既原則同要點，其中第四項寫著「考慮迎合全家總動員氣氛」，於是有「全家一齊出 普選一定得」、「為孩子，為未來，保普選」呢啲「迎合全家」嘅口號，不過呢啲口號係咪真係能夠「迎合全家」就真係見人見智喇。
八方曾經打俾商會問，佢話負責人唔係度喎。於是八方就去問問反佔中大聯盟發言人程介南，問下啲口號係邊度嚟，程介南話大聯盟只係負責簽名運動同街站，佢話雖然見過呢份口號參考，但就唔係大聯盟搞出來嘅，應該係大遊行籌委會設計同分發。
雖然程介南話唔關佢事，參加者都唔一定要嗌呢啲口號，不過佢就話大遊行係單一議題，如果有啲嗌「大會唔認同既議題」，就會請相關人士「放低標語」喎。
程介南又特別話大會絕不容許「即場派錢」的人，如果發現有呢啲人即刻趕走。八方就問佢如果第二日先派錢咁點，程介南就話「香港咁大，我地管唔到咁多」。