今日因為工作上嘅需要，同幾位媽媽一齊交收文件，其中一個突然間提出，好想搵個地方坐低飲杯嘢。大家嘅仔女都已經讀緊中學至大學，似乎最近遊行、上街嘅事，突然令大家好想講下自己同啲仔女嘅遭遇。

第一個媽媽話，6月15日，即二百萬+1人遊行之前一日，佢發覺個仔係咁搵黑色衫， 於是問佢係咪想去遊行，叫個仔小心啲。媽媽嘅心情，當然係見到血氣方剛嘅少年人，最怕佢哋唔了解件事，人去佢哋又去，點知個仔突然反問媽媽一句：「阿媽，其實你知唔知道我同啲朋友點解要出去呢？點解你哋啲大人成日覺得我哋係唔明白乜嘢事呢？」

媽媽對於突如其來嘅呢一句說話，有點不知所措，不過都好想聽吓個仔點解會咁抆憎。個仔就同媽媽講：「其實我哋覺得乜嘢都唔能夠自己話事，個政府只會畀機會聽政府話嘅人，而家終於有一樣嘢係自己可以話事，就係上街！如果一百萬人嘅聲音唔夠多，我哋就想畀多啲佢睇。個政府淨係識得叫人哋信佢哋，但係就乜嘢都冇真正做過。」

呢位阿媽話，嗰一刻突然間覺得個仔大個咗，都唔敢太過囉嗦，反而叫佢一定要飲多啲水，小心啲唔好整親，唔好衝。以前以為個仔淨係識得打機，原來個仔唔係咁樣。

另一個媽媽，其實都好詫異點解個女同啲同學仔堅持12號一早就要去到金鐘，明明平時個女都唔會想咁早起身啦！但個女淨係話好想去幫下手。原來呢啲後生仔係好嬲林鄭月娥一路都唔肯回應遊行之後嘅訴求。佢哋班同學之間傾開，就覺得啲大人強迫佢哋做錯事就要承認、功課做得唔好就要即刻改正，但係自己做政府嘅人，原來講一套做一套。 總之大家出咗去先，互相支持，有啲乜嘢可以幫手就即刻在現場幫手囉。

媽媽其實一路很難理解，原來個女收收埋埋對社會嘅睇法好耐，成日以為佢哋好鍾意返大陸玩，應該都無乜所謂香港而家變成咁樣，點知原來佢哋覺得去玩還去玩，見到社會變成咁就唔可以混為一談。

作為母親當然好希望自己的仔女可以喺充滿愛與公平嘅環境成長，我相信好多父母都冇諗過，2019年自己嘅仔女竟然會成為200萬人嘅其中一份子，走出嚟大聲疾呼，呼喊對制度嘅不滿、對社會嘅不滿、對政府嘅不滿。

我覺得，愛一個孩子，就係應該讓佢喺生活上參與，去了解社會發生乜嘢事，使乜囉嗦吖，只要係咁二提吓佢哋，記得注意人身安全，其他一切就由得佢自己直接去感受，咁樣嘅生命教育反而來得更有意義。

各位爸爸媽媽，記得唔好以為佢哋係人衝佢又衝，佢哋真係好介意大人以為佢哋冇腦、唔識諗嘢。我哋呢啲父母有時唔知有乜可以做，但唔緊要喎，學我哋嘅仔仔女女話齋，咩都幫下手囉！