故仔：蔡師奶
做師奶，老公賺果份又唔夠洗，個細路又細要照顧，又唔係讀好多書，咁即係時間唔穩定，但又等錢洗，咁會搵到啲咩工呢？就哽係唔謊係薪高糧準福利好啦！所以，炒散，就係我地嘅選擇，亦可以話，唔係一種選擇。炒散真係見盡人生百態，等我蔡師奶係到教精大家，無咁易俾人搵笨！
之三：報稅表要睇清楚 咪俾老細屈自僱
最近有個姐妹，幫同一間公司做promoter做左十幾年啦。個老細呢，就似乎唔算係最衰格嗰隻，唔係，都撈唔到咁耐啦。不過，老細呢種生物，真係無得講人情的，一下話變臉就變臉啦！
話說，咁耐以嚟，老細都認我姐妹係佢員工架，但係，最近老細炒佢，姐妹想追番啲年假大假補水等等，就搞到上勞資審裁處啦。點知，上到庭俾個官鬧到一面屁喎：原來，老細舊年靜靜雞係幫我姐妹報稅時，話佢係自僱。咁你知啦，我地呢啲炒散的，又唔係成日睇文件之人，收到稅單，銀碼啱咪算囉，邊識睇咁多嘢？
唉，搞到個姐妹迫住要同老細和解，應得果份都攞少啲。
日後各位炒散弟兄姐妹，如果你老細仲會幫你報稅，仲有強積金果啲，都要睇清楚，有無俾人屈自僱啦。