尋晚聽到睇到好多人鬧班後生仔係鬼，同埋鬧佢地玷污咗和平嘅示威。
鬧佢地係鬼，好處係完全唔需要進入衝突現場、完全唔需要了解班細路嘅背景、就可以安坐道德高地，用一個方便快捷不用思考嘅方法，去解釋一個自己睇唔明／唔順眼嘅場面。
簡單講，呢種mindset，同一口咬定佔中係美國佬幕後支持，係100%無分別。
至於玷污遊行論，我想講，政府面對1/7人口遊行都當冇事發生，先係對遊行最大嘅玷污。
同時，持呢種想法嘅人，心裡面不免認為，自己嘅方法（和平示威）係最高尚、最正統、最有效、甚至係唯一方法。所以即使班年青人過咗凌晨（民陣宣佈遊行完結後一小時）先行動，仍然會不忿呢班青年人破壞咗「我」嘅遊行，話視線被轉移云云（但政府有將視線向過103萬市民一眼咩？）。
所以，呢種mindset，同佔中時鬧班佔領者阻住「我」搵食、阻住「我」返工返學，係100%無分別。
我唔認同班後生仔嘅策略同時機，但警棍同胡椒噴霧攻擊喺佢地身上，我身同心都覺得痛。