攝：獨媒記者 Gundam Lam
每日因佔領行動而被捕嘅人，唔係一堆數字，而係默默為大家共同目標而付出沉重代價嘅人。
近來警方開始見人就拉，見人就打，每次衝突都會見到新聞好似當年沙士咁，前日拘捕咗40人，琴日拘捕咗30人，今日拘捕咗20人......呢班人唔係黃之鋒，唔係岑敖暉，我地無人知佢地係邊個，佢地為我地付出代價同時，呈現喺我地眼前只係一堆數字，係我眼中，我好敬佩佢地，講真，我都淆比人拉，仲要拘捕時侯受住警察狂毆，雖然我唔知佢地係邊個，但我打從心底係非常敬佩佢地為我地付出。
另外，講返琴晚，先唔講學聯升級行動。每次衝擊時侯，發現咗幾樣野。
第一：有好多人拍住拖嚟企前排，對比928面對警方回應行動，危險性一定係較低，所以就算女仔企最前，都唔係有太大問題，反而尊重佢地為真普選而唔懼怕，但近來警方暴力清埸，危險性完全唔可以同以往相提並論，女性企最前係有絕對危險。如果班女仔係勇武，大大隻就話姐，但眼見好多都係細細粒，連前面視線都唔夠高去睇時侯，佢地夾係中間，係好危險。而多數佢地身邊有個男仔狠狠咁攬住保護住佢，當衝擊時侯，女就低頭被保護，男就攬住條女，我想講，呢家唔係拍緊災難片，不但對整條戰線有影響，亦對你地自身都有好大危險! 拜託，真係鍚你地女朋友，就叫佢地去後面作物資支援，唔好再企最前，同埋唔好再著短裙短褲嚟。
第二：係人都知龍和道易攻難守，要長期佔領係有一定嘅難度，亦知道大家對政府憎恨程度就快按奈不住，好想衝衝衝衝......本人係支持，但唔係無組織地衝，唔該大家了解一下衝前嘅人，前面衝嘅人係最慘，一來硬食警棍，胡椒，二來後面班人唔理三七廿一不斷湧上前，進退兩難，一直喺到硬食。特別係去特首辨唯一一條樓梯，中間有大量梯級，只要有人一趺，就變成人踩人慘劇，我親眼睇住個女仔比人踩到叫哂救命，而拉佢唔走。至少都要留返條人道通道。
第三：裝備完全唔足夠，由旺角清埸前夕到琴晚，每次衝擊都唔洗一分鐘就比警方推散，只能夠不斷後退，加上被打不能還手，雖然人多，但好多都係企喺到影相，警察一嚟就散哂，完全唔係以「人多」就可以取勝。經過琴晚，相信大家都有個意識，再咁落去係咪真係有效呢，摧淚彈唔可怕，捱警棍先係堅，我地係咪要諗下裝備上要點做，每次衝擊防守時，有冇條理地組織一下? 我唔想怪學聯指揮問題，人地始終都係一支莊，仲係學生，唔係軍官唔係咩戰略大師，成班示威者睇佢地頭，佢地每落錯一個決定都累到大家，我體諒佢地。
不過如果再係咁，呢埸運動只係將示威者推去死。
其實成篇文我最想罵嘅人唔係學聯，而係坐係一直坐喺屋企對住部電視電腦睇住直播，而一直係Whatsapp，討論區大大聲講今晚點失敗，應該要點做，又應該要點衝，變哂鍵盤戰士咁用文字指揮變陣。
我想講，我屌你老母呀。
唔該你地班仆街出嚟睇下現埸咩環境先喇! 衝係我地，食棍又係我地，被拉又係我地，我地出嚟唔係為學聯，而係為真普選，知唔知夾係中間比人逼死有咩感覺，唔好講到衝擊好易，我地唔係士兵，我地都會淆，我地都會痛，特別係班「藍衣警」，佢地真係喪打喪拉! 你地就係屋企食住花生睇直播係到埋怨，知唔知收恥!?
以上內容全部都係發夢時諗到，唔係真實。
利申：反佔中，藍絲