撐起雨傘 2014年叱吒我最喜愛的歌曲大獎
Pan：大家好，我係撐起雨傘嘅創作人阿Pan。首先我想多謝所有支持呢首歌，同埋支持雨傘運動嘅香港人。我想講少少我創作呢首歌嘅少少因由。我想講，我寫呢首歌，並唔係因為我哋嘅梁特首，並唔係因為所謂嘅慈母，更加唔係因為所謂光明磊落嘅警察。我寫呢一首歌，係因為有一班每日為自己生活奮鬥嘅香港人，係因為有一班每日為呢個城市努力咁追求嘅香港人，亦都係因為呢一班努力追求真普選嘅香港人。正正係因為有呢一班香港人，所以先會有雨傘運動，繼而我先會寫得出呢首歌。呢個獎亦都證明咗，只要我哋努力咁樣去做好我哋認為應該要做嘅事，呢個社會嘅制度，呢個樂壇嘅規則，全部都可以打破。仲有一樣我想講嘅係，今日我哋爭取到我最喜愛嘅歌曲，明日我哋一定可以爭取到，我最喜愛的特首，我最喜愛的香港。多謝大家。
何韻詩：2014年係香港經歷巨變嘅一年，喺一個從來充滿住權貴，充滿住潛規則嘅地方，雨傘運動嘅年青人話咗俾我哋聽，原來去到呢一個年代，每一個人，都可以搵到自己發聲嘅方法。我哋唔再需要人哋去提供一個舞台俾我哋，只要有人民，只要有意志，我哋可以創造出一個屬於我哋嘅一個平台。2015年1月1號，我哋今日企喺呢度，我哋相信香港即將進入一個嶄新嘅年代，我哋將會面對更多嘅挑戰，更多嘅打壓，更多嘅不公義，但係，我相信，就如我哋嘅歌詞所講，任暴雨下，志向未倒下，只要我哋作為雞蛋，我哋面對高牆，可能一時三刻我哋冇辦法將佢推翻，但係只要將我哋嘅意志劃上去，我哋就可以將我哋嘅信念遍地開花。撐起雨傘記錄咗一個時代，佢唔係屬於任何一個歌手，唔係屬於任何一個單位，任何一間唱片公司，佢係屬於2014年，有為香港人去付出過汗水，付出過淚水嘅每一位，你哋。
黃耀明：若是人生，錯過這一晚，怕沒機會任意呼喊。呢兩句說話，提醒咗我哋，喺2015年，每一個香港人都要繼續為香港，為自己發聲。喺過去嗰一年，過去嗰幾個月，香港同埋好多嘅香港人，都經歷咗一個嘅突破，一個嘅覺醒。我覺得除咗香港呢個城市之外，流行音樂亦都需要一個覺醒。我哋應該重新想像點樣去創作，點樣去表達。我亦都希望就算係一個流行音樂嘅頒獎禮，都可以有一個完全唔同嘅表達形式。今晚有一班朋友，我係專登請佢哋嚟，因為我係回應大會嘅一個呼召，就係叫做毛管戙。喺過去幾個月，我睇到一個最毛管戙嘅一刻，就係喺youtube裡面，睇到呢一班初中嘅學生，佢哋喺佢哋嘅青年中心度，唱撐起雨傘，我覺得係最毛管戙嘅。佢哋原本係叫Big Boyz Club，但係經過咗呢個運動之後，佢哋叫做Boys Reborn。我哋想佢哋領唱呢一首撐起雨傘。
何韻詩：喺呢度我都想再多謝每一位為我哋呢首歌去付出嘅音樂人。佢哋不計勞苦，去為我哋提供咗最好嘅音樂，多謝佢哋。
後記：台下的傘，台上的黃絲帶，場外的淚水，金銅旺清不走的，我們的血汗，是夜，遙相呼應。不枯也不散！今後，民主路上見！