八九嗰年，大家五月嘅時候，已經知道天安門事件，好多學生、市民都聚集咗喺天安門。
當時，我啱啱開始做國泰航空嘅地勤，啱啱開始習慣返夜班，我哋同事成日會喺休息室聚埋食飯、睇電視，當時已經有部分關心政治嘅同事會好凝重咁睇相關嘅新聞，而身邊有好多人開口閉口講移民，對香港嘅前景有好多懷疑，人心惶惶。中共鎮壓嘅第二日，當時已經有同事準備咗一堆黑布，放喺休息室，俾大家攞嚟扣喺制服上面，幾日之間，大家都扣哂黑布，意義係想大家記得血腥鎮壓呢件事。
如果一個政權連面對自己錯誤嘅勇氣都無，佢可以點樣進步？
時間過去咗，有啲人選擇淡忘，但我覺得我想繼續做微小嘅事，可能係參與六四活動、關注中國人權運動等等，因為我想俾力量同支持一班失去親人嘅死難者家屬。後嚟，到我成為咗工會代表﹐我覺得佢哋追求公義、公平嘅精神係同我哋嘅信念係無分別。
係呀！我哋好微小，但我哋要堅持落去，喺中國境內目前仲可以講六四嘅地方，為佢哋呼冤，唔好讓事件無聲無息，否則不公不義會持續落去，甚至有一日會殺到埋身。
過咗三十年，對我嚟講，六四轉化成一種唔放棄嘅精神。喺追求職場公義嘅過程中，我成日同自己講，微小嘅事都要做，出咗聲可能未必有用，但我都要堅持、要講，我諗呢個係其中一個我傳承六四嘅方式——面對公義，我唔會放棄。