快速分析一下林鄭四大行動：
1）撤回
如果有人覺得個初心係撤回，而家已經收貨，運動再要求係變質，要鬧醒佢。因為運動已揭露香港更多問題（如警察濫權，721及831），亦有好多人無辜市民被無理被捕、受傷、死亡，唔可以離棄佢哋。
2）監警會加人
監警會以往調查嘅成功率極低（翻案率近10年係低於1％），關鍵原因係佢冇法定權力call証人証物，即係話，佢其實好多時係查唔到警察違規情況。因此先叫獨立調查委員會叫咗幾個月。
3）高官落區
落區應該係做官本身就要做嘅嘢，高官過去兩個月都冇落區。以往落區佢哋都係搵親政府組織，更多次取消公眾諮詢會，杯葛民間諮詢會。何況，林鄭自己嘅競選時嘅落區承諾都未兌現。
4）鼓勵學者獨立研究事件
無法定權力，呢類研究其實係做唔到，因為好多嘢係研究唔到。想像一個大學學者點可以查到警察有冇喺收押時濫用暴力？裸體搜身？不示警開槍等等？
政府呢個行為係卸膊，對學者亦係唔合理。
政府委任嘅獨立研究，參考早前全民退休保障周永新博士研究，結果不符政府期待，就被政府廢除，可見政府對研究有好多前設，並非真正獨立。研究，要有法定權力先會研究到，即係政府責任同本份嚟。
所以，結論，五大訴求，缺一不可。