當年戴耀廷教授發起佔中運動，個 magic word 係「去飲」；今次反送中大行動，年輕人嘅暗號係「野餐」，真係貼切到無倫。
對比下一場盛大婚宴同佔中運動。大家都飲過，都體會過參加一場飲宴嘅流程。首先收到請柬啦，請柬前口頭通知（依家梗係WhatsApp啦）唔係一個禮拜一個月喎，甚至早一年之前（佔中信念書2013年3月，早於2014年佔中一年多前）。呢段時間新人忙喇，男女雙方家長會面商量婚宴（佔中籌備三次商討日）、過大禮、揀婚紗、訂酒席（籌辦佔領物資，連流動廁所都訂埋）、新人籌組兄弟姐妹團（佔中義工隊）…… 一直到婚宴當晚，賓客到場永遠「七時恭候，8時入席，9時冇得食」（622齊投票 – 922 大罷課 – 去到 926 衝入公民廣場 – 927 宣佈正式啟動 – 到 928 催淚彈之後才全面佔領），主人家更加冇得食，輪流敬酒（晚晚不同人士上台講話），而客人起碼有一半未食到美點雙輝就散（未到全面清場已經好多散去），而總有一小部份留到最後飲到醉晒要人抬走（最後百人坐低被警察抬走）。Last 主人家埋單，當然有收到人情幫補（之前捐款，之後守護公義基金），不過如果筵席龐大，新人往後都要孭一段日子債（佔中九子判刑，當中四人入獄）。
老人家係鍾意擺酒。不過老實講，一場冠冕堂皇嘅婚宴係咪能夠成就一段美滿婚姻？可能最後都係俾賓客一個深刻回憶：我參加過邊個邊個嘅婚宴……
後生唔同，鍾意野餐。野餐唔使請帖，唔使籌備，唔使商討，冇主人家，自己鍾意就 Pack 啲物資走嚟坐低，冇限定一圍枱幾多人，冇特定菜單，只要場地適合，啱時間就嚟，野餐完各自收拾自己物品離開，唔使主人家排隊送客。正正就係反送中抗爭行動模式。真係吻合得天衣無縫。
我年紀唔細，但係我鍾意野餐，亦欣賞年輕人野餐嗰種活力。不過野餐有可能暴曬雨淋，會有蚊蟲叮咬，玩下手野狗野豬出沒，歎慣酒樓冷氣嘅成年人，未必喜歡呢種活動。唔緊要，可以繼續喺裡面歎冷氣，不過唔好隔住窗睇唔清楚外面情況就指指點點：「叫佢唔好去嗰度啦，危險呀！」，信任佢哋識得照顧自己，只需要喺暴雨或者野獸出沒嘅時候，開返度門俾佢哋入嚟避一避，有能力嘅攞把遮出去幫佢哋擋一擋，已經足夠。
理解嘅，有機會出去同佢哋一齊野餐。