睇左好多唔同媒體，人士既文章，佢地都表示左自己各有既立場同意見，而我係感到好無奈同矛盾。我發覺所謂既鬼根本係人心所成，而且結果出到黎，明顯睇到整場佔領行動惡化落去都好難再走落去。
我記得好早前曾經演算過行動發展落去會變成點，我認為最後並唔係警察清場而完結，亦都唔係泛民嗌散水，而係自然流失直至再冇人企出黎。
因為分化問題好早就已經存在於金鐘內部。明明大家都係為左場佔領好，但偏偏各自各做自己認為好既野。意見不同又各自企硬立場，冇中間冇共識，認為對的事就去做，但冇尊重過他人意見，然後結果出到黎唔對路就鬧鬧鬧，最後走得一個得一個。呢種咁既情況已經唔係第一次發生，之前有少數藍絲搞事既時候就已經出現呢個問題。依家發生既就係分化到極點衍生出黎，激進派或者叫熱血既市民再唔相信呢場佔領行動而離開，同時企響和平道德高地既市民見此情況都唔再黎金旺銅。
自然流失至無人留守，只係時間既問題。
真普選背後既係民主同自由，雨傘背後既係守護良知同抵抗暴力。
當日928點解大家都衝，係因為大家都有個共識響到，個共識係大家都為左爭取民主自由，守護良知、抵抗暴力，所以當時一衝大家一齊衝。而再之前只不過係需要一個領航人，帶住大家一齊去做相同既事就已經夠，但可惜既係前日發生既事情明顯係出於冇計劃冇共識而衍生既情況，令到大家都遲疑不進。
有人會將事情歸咎於衝擊者，認為衝就係鬼；有人亦都會將事情歸咎於糾察、大台。但反觀大家既原由，其實都係為左整個行動好而做出相應既事情，只係因為取態不同至會形成分化。得罪講句，最後做出黎大家都冇好處，只係益左班建制。
你問我，我都會覺得撞果班人好有問題，點解撞完閃走，而且我留守咁耐都未見過佢地，係咪鬼黎？ 我諗好多人同我一樣都有咁既諗法。但另一方面睇，糾察無需要阻止其他人去立法會，因為每個人都有佢地自己既想法，要阻都阻唔到。不過老實講，依家事後孔明繼續搞分化對成件事有咩作用？
民主從來都係要尊重所有唔同人既聲音，而響佔領行動入面，更應該貫徹民主既信念。我知道每個人都有唔同既意見同取態，但絕對唔能夠一意孤行去做自己想做既事。因為我相信一樣野，就係響各方交流磋商既情況之下，一定有一個大家都認為合適既方法去解決問題。可能商討過程中係比較困難，但我地唔係共產黨同香港政府，意見交流磨合先至係民主既其中一步。或者有人較為固執，但大家目的既然係相同，我相信一定會有種更好既方法。或者最後結論都係合唔埋，但都唔需要阻止對方，反之係要尊重對方。
「共識」呢樣野其實係好重要，雖然整場佔領行動都係自發而成，但唔代表能夠本末倒置去做一啲令人反感既事，講緊既包括少數衝擊者以及少數既糾察。要記著初衷，而呢個初衷就係當其時既共識。
互相問候伯母並唔夠能解決問題。但既然出現反對既聲音，係咪應該要先反思自己所做既行徑，再去改善呢？大家都係為左件事好的話，更加要理解反對聲音何在，互相去理解、深思、探討、改善。
金鐘係需要大台，但並唔係大會講台，而係大眾平台。
我記得佔領初時，旺角有一個中間點係比所有人去發表意見，可以聽到唔同聲音。或者旺角外在感覺比人好唔和平，但我反而認為旺角係最團結、最和平既一群，而到我去到銅鑼灣亦都可以做到公民講台。
依家有種聲音叫人拆大台，其實我覺得佢地咁做不無道理。但並唔係暴力形式去拆，而係將依家金鐘既大會講台轉型為大眾平台。糾察維持秩序冇錯，但糾察過於盲目唔去理解拆大台人士既原由而去阻止亦有問題。當形成大眾平台，糾察只需要歸回原點去維持秩序就已經足夠。
團結先能夠成為利矛，要繼續堅持落去的話，團結係必不可少既因素之一。
我知道好多人都會將金鐘人、旺角人咁去定型各佔領區既人士，因為兩區大部分人士既心態都有分別。而我認為金鐘係需要旺角既人既果種團結同心態，但同時旺角亦需要金鐘既人果種冷靜同計劃。響互相取長補短既情況下，先至可以繼續推動佔領行動既進展。