24/9
＊ ＊ ＊
問：點解會成立守望前線？
Dorothy：傘運嘅時候我喺中大政改行動組，幫學聯傳訊。13 + 3 接連入獄，都有大家都認識嘅朋友。我當時就問有咩可以做。
成員：我地預計到愈嚟愈多抗爭者失去自由，所以想成立一個支援組織。初時係諗心理同社工支援，但後來覺得除左支援抗爭者同家屬，仲要守望其他市民，一齊投入支援運動。
過度地持續動員，或者以悲憤嘅心態參與集會，對運動未必係好事。
守望前線嘅縮寫就係「SOFT」（Story of the FronTiers）。一來希望用溫柔嘅方式，治療大家嘅無力感，激勵士氣；二來希望大家關注所有抗爭者，所以我地強調「共同體」依個理念。
＊ ＊ ＊
問：你們無分派系，把所有抗爭者的名字並列（圖二）。但不少人物所屬派系，彼此間勢成水火。點解咁做？
成員：守望前線有個信念，只要唔係為私利，而係為社會宏願，都係被政府打壓，大家都係抗爭者，依個精神先至重要。唔能夠俾政府邊緣化，形容佢地為普通罪犯。如果冇人關注佢地，係一件可惜嘅事。
＊ ＊ ＊
問：看節目場刊，平生首次見到抗爭活動可以搲到 funding＊，點樣做到？
（註：在場刊留名贊助的「外國勢力」有 Civic Space Initiative 和其名下的 Together we speak 運動）
成員：今次活動我地冇公開籌款，只係向一啲人募捐。佢地就係政府成日講嘅沉默大多數，唔想開名，但對一班年輕人要坐監感受好深，好樂意支持我地。
我地亦認識一啲民間網絡，外國團體都好關心香港青年爭取政治權利、集會自由。
＊ ＊ ＊
問：守望前線有幾多成員？
成員：（問大家）究竟我地有幾多人？。。。肯定唔過十人。由提出到落實音樂晚會，不過係依幾個禮拜嘅事。