按：原文為7月22日，刊在作者 Facebook Page
兩個鐘前，我喺元朗站經歷了一場撕殺。
當時正坐西鐵返屋企，當中仲有好多普通市民可能係出完街或者放工。
喺途中，一直收到一啲寫住「唔好喺元朗落車」嘅air drop。大概十一點，列車去到元朗站，依然有唔少人落車，但落車嗰陣月台已經有好多市民（目測係後生仔居多）喺度向車廂嘅乘客講：「唔好落車呀！快啲走呀！下面有班白衣人打到啲乘客爆曬血。」
起初，冇乜乘客理會，照落車。但月台嘅人係咁叫乘客唔好落，甚至有市民不斷問車廂入面有冇First AID喺度，有人流曬血想急救，同一時間亦有市民叫乘客企入啲，畀更多人上車，事情擾釀咗幾分鐘。
當時有啲中年師奶、阿叔唔耐煩：「搞咩耐仲唔開車？阻住曬」、「唔好阻住人返屋企」、「早知唔上呢架車啦」，甚至有個師奶講咗句：「打還打呀，唔好打到我。」嗰刻聽到呢啲說話真係好嬲，點解可以咁自私咁冷血？你唔幫手都算，仲喺度咁多聲氣。正想開口叫佢哋唔幫手就收聲唔好嘈，突然車廂有廣播：「列車暫時未能開出，基於安全，請車廂內所有乘客落車。」
落車？我開頭都以為自己聽錯，但廣播一直重覆叫人離開車廂，即時有乘客鼓噪：「出面咁亂你要我哋落車？」、「可以走去邊呀？」由於當時我企喺近車頭位置，唔知道白衣人原來已經喺車尾位置。
當時有人在場叫著黑衫嘅人快啲換衫，我隔離有位乘客亦好好心提醒幾位外藉穿黑衣嘅人士小心，同一時間突然又有廣播：「請車廂內所有乘客落車」，結果成車人相繼落車，但講真落車可以去邊？
落車嗰刻真係好慌忙，到底可以點走？諗住走返車尾，點知車尾有人大叫；「走呀！打到嚟喇！走呀！」嗰刻真係亂到乜都望唔到，完全分唔清邊啲係白衣，邊啲係乘客，只知前面不斷有人亂走；到底你要走去邊？完全冇人知，你想走返入車廂，入面已經有人亂打緊；你想走落樓梯去閘口位，有人大叫；「唔好落月台呀，死緊㗎！」
上面有人追打緊，下面有人要上嚟打你，根本困獸鬥，唔好講笑，完全係屍殺列車咁，總之避得就避…
當時我正企喺樓梯位，於是落去閘口位；當落去，係見到起碼有60幾70個手持藤條、木棍嘅白衣人喺度，不斷棒打欄杆同叫囂；更甚嘅係，佢哋發爛追住一個唔知記者定乘客，然後追到去形點嗰邊個出口，佢跌低咗，然後起碼有6個人衝咗去圍住佢用藤條木棍狂打，然後一腳踢爛咗佢手上部相機，直飛前面條柱爆開咗，極有理由懷疑係想毀滅一啲影像。
嗰刻我又驚又嬲，我本能反應叫咗句；「屌你老母打乜撚嘢」，在場亦有其他乘客都幫口：「乘客嚟㗎！唔準打」，但當然白衣人嘅回應係呼喝：「關你撚事呀屌你老母，收嗲！」然後有個白衣人企圖衝入嚟打乘客，但唔知係咪靠嚇，入咗嚟又出返去，然後成班白衣人好似贏咗波咁喺度叫囂。當時我身邊有對剛喺元朗食完飯嘅情侶，我即刻同佢講：「我哋Stay埋一齊，起碼大家都安全」，我都好多謝佢哋同車上另一位乘客借出尿袋我叉電。
嗰刻元朗嘅情況已經失控，現場係一片瘡痍，最嬲嘅係警察而家先嚟到了解發生咩事。喂，畀人打完你先嚟睇發生咩事？你冇撚嘢呀？當場有市民破口大罵，但警察只係用不耐煩聲音：「唔好阻住警察做嘢」、「咁你而家咁燥都冇用」。
講真，如果唔係你哋視而不見，唔及早阻止白衣人入站，我哋一班乘客會使畀人恐嚇？而家唔係講緊「有事搵警察、冇事屌警察」。除暴安良係你哋責任，做得警察就有責任做嘢，唔係因為最近畀人鬧好大壓力就選擇性唔使做，甚至係唔做㗎！
後來，因為我哋架車喺冇通知下離開咗，我同嗰對情侶都冇車走，唯有各自Call的士離開。臨走前我上返月台望一望，只見一片狼藉－地下有遮、有眼鏡、有木棍、有手袋、甚至有血…
只需幾分鐘，元朗站就變成屍殺場地…
講真，嗰刻離開車廂真係迫不得已，但我唔明點解港鐵會要求乘客喺危及關頭下要人離開車廂，入面有老人家同小朋友㗎！而後來點解啲人離開車廂，你又會開走咗架車？可能真係我miss咗廣播，堪入冇人管嘅狀態，十足十而家嘅香港。
我驚，成個人震曬，但其實我更加嬲，嬲點解一班鄉黑可以咁無法無天；我望住個疑似記者畀人禁住地下打，但我完全救唔到佢；而我更加冇諗過，晏就睇片班白衣人打人，夜晚我係親眼睇住呢件事發生…
而家香港嘅情況，就係連你搭車咁正常嘅事都有機會出事，而警察做事係可以慢成咁…
成日話示威者係暴徒，而家你睇清楚邊啲先係暴徒未？如果你係都要包拗頸反駁：「暴徒畀人打係啱」，呢個已經唔係對與錯咁簡單，而係冷血、冇良知、同冇人性，得罪講句，你枉為人。