大家好，我係劉頴匡。今日法庭頒佈左我既選舉呈請結果，並判我得直。判決理由主要係選舉主任無按程序公義喺DQ我之前俾我解釋立場。
首先，我要感謝律師團隊過去不辭勞苦既付出，先可以得到呢個裁決既結果。不過，我認為，呢個絕對唔係勝利，而只係喺一場落後既球賽裏面，搏到對手一次犯規。我地距離勝利仍然好遙遠。
而家我地每晚高呼「光復香港、時代革命」，呢句口號係源自2016年參與新界東補選既梁天琦。我地曾經幻想過，本土派既理念、新時代既聲音，可以透過最平和既途徑進入議會，改變香港既政治生態。但係，梁天琦其後參選同年既立法會大選，就被取消資格。及後，青年新政既梁頌恆代為參選，終於獲得足夠票數當選，但又再因為宣誓事件，被禠奪立法會議員資格。
我喺2018年1月，報名參與因梁頌恆議席出缺而產生既補選，但最終我都同樣遇上被DQ既命運。
本土派經歷左咁多重既DQ、咁多次既政治清算，到今日只係換來一句似有還無既呈請得直。梁天琦仍然身陷囹圄，梁頌恆代表既民意仍然係被蒸發得無影無蹤。咁樣根本稱唔上任何勝利，我地面對既全方位打壓，只係比過去更慘烈，我地面對既畸形制度，只係比以往更扭曲。呢個亦都係我地呢三個月嚟，拋頭顱、灑熱血，唔怕死咁企上街頭既原因。我地一早就已經唔可以返轉頭。
真正既勝利，係有朝一日，香港所有政見既人，都能夠喺一個普及而平等既選舉裏面參選，為民發聲，唔需要面對任何白色恐怖，唔需要接受任何政治篩選。而要實現呢個目標，選舉呈請遠遠唔足夠。香港人要把握眼前呢一次難能可貴既機會，用最強既鬥志戰鬥到底，先有可能將「光復香港，時代革命」既理想實現。如果我地今次再輸，我地將會輸咗整個香港，輸咗一整代香港人。
我知道好多人會留意到，近日周庭同我既兩次選舉呈請得直，變相會令到民主派既區諾軒議員同范國威議員失去議席。
我同意，呢個可能會係民主陣營面對既一次陣痛。但係最重要既係，我地喺面對呢個陣痛既時候，始終都要保持團結一致，唔好反而因為選舉呈請既得直，而令我地增加左分化既可能。
民主派議員喺今場運動，都有唔同程度既參與同付出。例如區諾軒議員，多次喺衝突現場企喺警察防線面前同防暴警察據理力爭。我深信民主派會繼續為我地爭取既共同目標努力。
講到底，一切政治操作，都遠遠比唔上眼下呢場抗爭更加重要。我地已經有千幾個抗爭者付上唔同程度既代價。我希望呢場選舉呈請，可以提醒大家現時香港既政治制度有幾咁不堪，可以令大家記起，我地係點樣走到今日要踏上魚死網破既呢一步。抗爭仍然未完，無論係社區文宣，抑或各式各樣既遊行集會，依然唔可以停止。我會繼續竭盡所能，為當下呢場抗爭略盡綿力，喺我能力範圍內做我可以做既嘢，兄弟爬山、各自努力。
而家呢場波，我地搏到對手犯規，但仍然落後。香港人再無死守既餘地，一定要傾巢而出，全力搶攻，最終先可以迎來勝利。
香港人加油。
多謝。