隨住香港本土意識抬頭，越黎越多人關心香港政治，支聯會借燭光黎籌旗嘅歌仔越黎越無得唱，「悼念就是抗爭」呢種說話都講得出，講真，唔好當香港人傻仔，更加唔好當班學生傻仔，佢地唔黎參加你個party，意料中事啦下話？明知你葫蘆入面賣咩藥，仲會同你玩落去? 掉番轉，班學生又型嘅，講到六四好似小事一則，可能就係為左要同支聯會班人狠狠地割蓆，兩邊係到嘈一輪。未到六四，已經分化到咁，仲話悼念，真係悼條鐵咩，你地對唔對得住當日慘死嘅人民呀？！
六四事件，就係因為政府仆街，係要用軍隊鎮壓人民，以為殺一就可以儆百，點知越搞越大，越死越多，當時北京本身嘅軍隊都拒絕血腥鎮壓，所謂的領導人仲要調外省軍隊入城做呢件事，可想而知心腸有幾狠，百姓條民真係賤過地底泥。瘋狂屠殺仲唔夠，仲要通宵清場扮無事，仲要用謊言模糊歷史，將六四漂成白紙，十年，廿年，依然唔認錯，唔平反。黎到甘七年後，有人悼念，好正常姐，呢件係世界大事黎架，就算全世界都悼念，都應該呀，方法同地點，又有咩所謂呢？
講真啦，悼念真係越黎越公式化，去維園，點燭光，唱下歌，一年做一次，忽然熱血，就當自己貢獻左？ Facebook Profile轉張相就當自己清高左？Come on，唔好咁啦。問下自己，有幾關心呢個香港，呢個政權搞到香港幾亂，你又有無出過聲？有無盡力令身邊嘅港豬醒覺? 當然，無人話呢啲事易做，就係難做先要做呀嘛！ 當年，甘迺迪總統話十年內要美國人成為第一個成功有真人上太空，當時所有科學家都話無可能做得到，於是佢話 : 「就係因為困難，所以我地先要做！」，高下立見了。
你唔妥我，我又唔妥你，咁咪分開做囉，互相攻擊有意思咩？留番啖氣，諗下有咩可以做，救下瀕臨絕種嘅香港人好過啦。團結都咁難，仲話想港獨？算啦，六師弟。