兩年前港大「眀峯」與「Smarties」對決，令學生會的政見備受關注。從此每屆選期，筆者會盡力走訪各大院校的候選內閣，詢問「政治必答題」。
筆者先訪港大睿鳴，再訪中大山鳴。訪問後者時，明報已推出訪問＊。故按捺不住追問頗多問題，對後者頗不公道，謹再三致歉。
（註：goo.gl/MdJm38）
＊＊＊
問：你地點睇六四？
山鳴：六四犧牲嘅學生和義士，為中國民主付出生命，有需要悼念。但由於我地係香港人，唔會咁覺得中國的六四事件係自己件事，亦唔認同支聯會「建設民主中國」綱領。
問：所以今年一樣不會去維園？
山鳴：我地仲傾緊會唔會同港大一齊搞論壇，但就一定唔去維園。
＊＊＊
問：你地點睇中共？
山鳴：中共係一個獨裁政權，殖民香港，反抗係義務。
我地好欣賞中國傳統文化，但同樣欣賞其他國家文化。
係而家環境，好難將中國同中共完全切割。獨裁政體嘅教育，始終令好多中國人民覺得黨國一家。雖然有人話「對準政權」，但技術上同實際上都好難。
＊＊＊
問：你地點睇香港嘅政治前途？
山鳴：可以叫廣義的本土路線，包括港獨和城邦論都可以接受。最重要係香港有自己嘅治權。
＊＊＊
問：如貴閣有幸當選，會主張以什麼形式抗爭？和平抑或勇武？有沒有被捕的準備？
我見明報訪問，似乎有小小衝突。你們「不鼓勵暴力抗爭」，亦「不排除衝擊」？
山鳴：好似現屆會長周竪峰圍堵校委會，算係衝擊，但唔算暴力。我地有可能發起行動，但唔鼓勵傷人。
問：馮敬恩可謂近年孭飛孭得最重的學生會長，有沒有擔心？
山鳴：老實講，驚梗係有，會盡量避免，但已經有準備。
＊＊＊
問：忍不住追問一些問題。
去年中大首支本土莊「星火」當選，與港大學生會同樣不再赴維園，但去年爭議特別多。
例如港大先有馮敬恩的眀峯，繼有孫曉嵐的碩苗，開始在港大另辦六四論壇，但依然有悼念儀式；然而中大的論壇，則表明不會悼念，當時掀起頗大爭端。
如貴莊當選，是否會延續「星火」路線？
山鳴：星火造成一些爭議，未必係理念上嘅分歧，而係處理手法引致衝突。
我地唔會挑起對立，唔會針對人，就事論事。
唔同事情上有合作空間，都可以合作。比如民陣搞遊行，理念真係配合，我地都會參加。
＊＊＊
問：中大仍是學聯成員。若貴莊當選，會否繼續發動退聯公投？抑或改革學聯？
山鳴：一旦退聯等於完全放棄學聯資源，即使想攤分學聯資金，都要先改革。未來一年嘅工作，應該唔會退聯，會係學聯內修章改革，之後先決定係咪退聯抑或其他。
＊＊＊
問：在明報訪問，知道一位成員曾任學民思潮義工，說「香港處於水深火熱中，為何要理『其他國家』的民主？」
很好奇想了解你的轉變？
朱安妮：首先澄清，我從來唔係學民義工，只係加入過中學政改關注組。
係佔領中後期本土派「拆大台」，嗰時開始諗，究竟邊一種方法先有利爭取民主？然後見到本土派嘅論述，「係喎，真係冇諗過」，慢慢開始留意，睇佢地寫咩，漸漸認同佢地。
問：當你認同本土論述後，是否認為港獨才是出路？
朱安妮：如果香港想有真正自治，係中共嘅統治下，基本上冇可能。香港人自治嘅唯一出路，可以話真係香港獨立。
＊＊＊
問：台灣人很關心美國政治。因為一旦宣佈獨立，中共派軍鎮壓時，究竟美國制裁了事，抑或出兵保護，左右台灣存亡。
正如法國大革命後，法國人很本土愛國，亦不礙他們致力推廣民主到各國。除了因為他們擁護民主，周遭各國奉行什麼制度，亦左右其國家利益。
為何香港「水深火熱」？怎樣不理中國政體對香港的影響？
朱安妮：當然我地支持中國有民主，正如我地支持其他地方有民主。
但係香港嘅議題上，應該以香港為本位，先於中國。係咁嚴重嘅情況下，我寧願專注於香港，因為香港已經有太多議題要面對，冇咁多時間理中國。
山鳴：其實嗰句話係回應六四。係香港本位上，六四係咪咁重要？我地覺得有更多更重要嘅事，值得香港人關注。
＊＊＊
問：訪問你們的問題長好多，我知道好不公道，最後一條問題。最近本土派比較低沉，你們期許自己能做什麼？
山鳴：本土派發展嘅理論一盤散沙，未必係壞事，一盤散沙亦比較難統戰。問題係本土派分支之間，經常有人身攻擊，唔係關乎論述，好唔健康。應該實際作理性討論，邊條路線對香港最好。
我地好強調，學生組織獨立於政治組織，會盡量避免捲入政治旋渦，保護學運。所謂政治旋渦唔係指政治事務，而係一啲政團間嘅衝突，我地唔想牽涉入去，學生會應該以學生為本。
同學中討論政治嘅人愈來愈少。如果我地表現到能力，各方面都做得好，相信會有更多同學信服。咁樣人地先會聽你講，感染到身邊其他人，依個就係我地想做嘅方向。