七一之後有一晚我在社區搞放映會，有對年過六十街坊夫婦，退休人士，特登落來撐場，站足了全晚。
「我以前都係好和理非㗎，無諗過會行到咁前！」他們很努力地和我分享他們在反送中的示威行為（做咗啲平時和理非唔會做嘅事），又為我的社區工作絞盡腦汁提供意見。
「咁你地覺得點解你地會有咁樣轉變？」我好奇寶寶上身。
「雨傘嗰陣都支持嘅，不過就唔認同年青人衝擊囉，直到呢兩年個仔喺外國返黎，佢罵我地食花生呀。」他們說。見到他們臉有愧色，相信他們是真的很愛兒子，才聽得入這樣「大逆不道」的說話。
雖然我沒有表露，但我當場都好愧疚。
話說七一當晚，我拖著疲累之身回到家，平時算是深黃的爸媽卻在看tvb，唔知點解有鄭伊健喺度飲飲食食。接受不了這個平行時空如此安穩，我氣不打一處來，語氣好「倔」，一句「得」埋去：「轉台啦，睇咩CCTVB。」
脾氣比我更「倔」的我媽說：「我唔想睇，咁亂，佢地唔應該衝囉，太暴力。」我爸就話：「佢地真係示威者嚟㗎咩？」
於是我們展開了不傷感情但都針鋒相對的對話，我說你要明白年青人絕望，媽媽說年青人大把前途，何必咁傻，我說你看像年青人自殺都已非今日之事，爸爸說衝都做唔到甚麼，我說我當然知道，但唔衝又做到甚麼？
「你地都已經上岸當然唔明啦。」我權威地扔下一句。
「我地有上街，有遊行㗎！」爸爸委屈。
「咁你地爭取到啲咩呀！」我語氣更衝。
爸媽不語，然後我繼續食他們為我準備好的食物。
其實話說出去當下我已經有點後悔，但心情實在太差，拉不下面子來道歉。但第日我爸出門前，過來跟還在賴床的我說了一句，「囡你講得啱，班學生唔係暴徒。」
我雖然未訓醒，但我都好震撼。
於是我想，如果我們要他們體諒，我們是因為絕望才走向勇武，我們也應該體諒，他們成長於一個還有秩序的世界，一個還是有「獅子山下」夢想的世界，資訊也沒有我們接觸得那麼快。他們不可能一時三刻接受香港走向淪陷的現實，但多點體諒，多點愛，有良知的人是沒有鴻溝跨不過的。
世代Reconnect，多謝林鄭。