香港經歷了百般滋味的個多月，身在美國南卡羅來納州的林仲生（Tom）隔著海洋、隔著螢幕，也感受到香港的水深火熱。
他是80後學者，香港土生土長，06年赴美深造，博士畢業後於Clemson University教經濟學。雨傘運動開始不久，他已不安於「隔岸觀火」，盤算著回港一趟。安排好學生的mid-term及自修習作，他終於在10月底回來了。
第38個晚上，我們走在夏慤村的帳篷之間，親身見證歷史。
從此香港變天
「政府一開始就用啱strategy，趁未多人嗰陣拉晒班友，所以第一日我已經揼心，哎呀，政府今次咁叻嘅！於是開始好intensive咁去追。」9月28日，警方一天內投擲了87枚催淚彈，Tom越洋跟身在金鐘的朋友保持聯絡，當天謠言滿天飛，他收到的資訊同樣亂七八糟。接下來的日子，許多香港人睡覺也抱著手機，那時Tom亦亮著案上的幾個螢幕，邊工作邊看新聞直播，和我們一起捱過多個不安的日與夜。
「今次社運同之前好唔同，令我覺得好特別。喺呢個運動入面，引用司徒華話齋，我都唔知邊個揸得住支咪。特別呀，印象中未試過。」那87枚催淚彈觸動很多人，但令Tom最印象深刻的，卻是黃之鋒獲釋後群眾的反應。「當佢番嚟揸番支咪，再同班人講嘢嘅時候，我發現大家嘅感受唔同咗，唔係嗰種『你終於出番嚟帶領我哋喇』咁樣。」那時他才感受到香港「變天」。
與學生談領佔
香港雨傘運動的消息傳遍世界，Tom也會在課後向學生解釋運動理念，並分享個人見解。「唔係覺得佢哋會幫到個運動，只係認為我有義務同佢哋講，香港人掙取緊乜嘢、點解要掙取。」
不同背景的學生對這場運動的態度迥然不同－－有美國學生不理解中港關係，更不會明白運動何以發生。也有來自印度、孟加拉、巴基斯坦的學生認同香港該以短期損失去換取長遠利益，但覺得港人太submissive。「你睇孟加拉嘅歷史，佢哋向英國、印度、巴基斯坦爭取過獨立，每次都係fight番嚟，唔難想像點解佢哋咁諗。」
被打殘的一代
大陸學生態度兩極，有的很氣憤，有的很支持。「佢哋好多都同我講，其實大陸人唔係唔鍾意民主，而係唔care。我問，點解唔care？因為仲有好多重要嘢可以care㗎麻。係合理喎，我唔覺得佢哋係特登咁講，佢哋真係咁諗。」他打了個比喻：「你阿爸阿媽都好危險，阿爸救得番，阿媽救唔番，你點努力都救唔番。咁你緊係選擇救阿爸啦，人之常情丫。你話佢殘忍，係個唔啱嘅指責。當你去到最極端嘅時候，就會明白個Econ原理，令你唔care好簡單之嘛：你追求唔到。」
這一代香港人的抗爭，讓Tom想起六四。他曾經看過一段影片，記者拿著「坦克人」照片訪問北京的新一代，他們的回應令他錐心。「佢哋唔識答唔令我心寒，但係佢哋見完之後，同隔離嗰個咬耳仔，然後答，應該係外國照片。你瞓著咗，我仲可以叫醒你；你扮瞓，我係叫你唔醒，宜家中國有一大乍人係咁樣。咩叫打殘咗嗰代人？係你打到佢哋扮瞓，好大劑！」
「我好希望香港今次會贏。」回說雨傘運動，他心有戚戚焉，「如果今次香港真係搞唔掂，仲有乜嘢可以搞得掂？」
冀港式抗爭贏
港式「和理非非」抗爭，溫文有禮，贏得西方讚譽。但Tom說，他們欣賞港人，卻不覺得這樣能夠成功。「係有好多方法可以達成目的，而我哋會用香港嘅方式去做，由我哋證明俾大家睇。」
「所有革命喺成功之前，都係好似冇可能咁。」黃絲帶與藍絲帶角力，民間意見分歧，但他認為，民主為成主流並非虛無縹緲，表面上親建制者眾，實質大部分人只是想維持現狀，沒有明確立場。「世上總有10%人支持革命，10%人支持建制，80%人是你成功咗我就支持你。所以當建制存在，就有90%人支持佢，但你一旦成功，就有90%去反嗰10%。」
「好多人都話，雨傘革命幾amazing，因為香港人平時咁市儈，點會做呢啲冇profit嘅嘢？但我覺得香港人唔係真係咁市儈，香港人係好有ideology，有追求嘅嘢。香港人喺逆境中，仍然可以搵到方法去適應，得到我哋追求嘅嘢。」
「Wishful thinking係有嘅，我覺得中國無論如何都會走向民主，因為我係香港人，我希望呢樣嘢由香港開始。唔由香港開始係冇所謂嘅，中國都一樣會走向民主，要時間囉。希望係由呢度嚟，如果你信呢個hypothesis，就係中國會走向民主，而如果中國要走向民主，香港係最適合嘅起點。」
等待民心回歸
他曾經跟朋友打賭，中國會在20年內享有言論自由。「世上冇極權政府抵受得住information flow，或者倒轉咁講，所有極權地方係因為information control做得好好，所以先可以極權。Information好神奇，唔可以unlearn，flow咗入去就唔可以flow番出來。」
Tom相信中央不是要絕對的安全，否則中國不會有互聯網。「你大權在握，你要安全係得嘅，但安全完永冇high return，呢個係投資嘅問題。咁安全香港未必會做得咁好，唔止淨係香港自己好，香港對中國嚟講係有好處，如果希望香港benefit到中國，所謂中國好香港好、香港好中國好，係有呢樣嘢，但唔能夠建基於吓吓都要安全。要有一定程度嘅信任，呢個唔係零和遊戲，香港嘅利益同中國嘅利益係可以align。」
雨傘運動有怎樣的成果才算得上贏？Tom認為是一個普選時間表。「個時間表應該係好遲、好遲，但係要有時間表，而我覺得有機會。」
「等呢代（領導人）退落嚟，下一代意識到information flow，香港人已經學識咗民主自由，唔可以unlearn佢，unlearn佢難過六四嗰陣打殘嗰代人好多。佢哋意識到呢樣嘢，既然做唔到，就諗個折衷辦法啦。當佢哋咁諗，真普選開始就成功，我終於會見到香港成為中國一部分。」