十一月將盡；月內香港社運o既最熱點，除o左係大家樂扣飯鐘錢而起o既抗爭外，怕且都係未解決o既菜園村搬村問題。社運八方呢期稍懶，幾日前開始擊鍵為文之際，菜園村居民同支援朋友重係想當面問鄭汝樺一句，記唔記得先搬後拆o既承諾。剛過o既星期三立法會開大會，鄭汝樺終於叫答o左o的o野，但兩家始終都埋唔到欄，問題重係未解決。
搬村未了，談判未啟，但收地已行。話說地政處11月4日o係菜園村第一次收地，菜園村居民未有新村，固然唔郁，支援朋友亦成立巡守隊備戰。11月13號港島北一次遊行，稍集人氣；11月16處，地政署就第一次小收農地，清除作物，村民同支援者認為係突擊。跟住就係11月19日，地政處之前宣布定o既第二次收地。支援朋友各言目的，有o既係保護私有產權，亦有人諗住正面面對國家加資本云云。
社運八方用到個「戰」字，唔係作大。之前已經有《菜園戰訊》，11月13日，朱凱迪篇〈為新家園戰鬥到底〉上埋《明報》評論版，「戰意」連同決心，日復日濃。唔知係咪為戰鬥氣氛增添多少少解讀，余在思就從石油氣罐講起，話佢既可以有爆炸o既可能同意象，但又何嘗唔係日常生活所需呢；林藹雲多補一筆，提到九十年代中荃灣收天台屋時o既一幕，攬罐亦即護家。社運八方不妨再多講一件事：當時亦有社工聯同街坊帶石油氣罐出花園道中間，社工o既講法係，係想o係中環一帶上演街坊生活日常。
至於圈外，一位自稱係半世紀新界西，而唔係石崗或錦田原居民o既阿貓，就o係自己blog發文，話菜園村關注組貪得無厭，重備埋資料來源添。而呢篇文亦不具名地o係11月19日o既《經濟日報》同《明報》提到。綜合阿貓自述，日中聽到唔少料，覺得菜園村一事好多唔妥處，因而評點，呢篇都已經唔係第一篇，評點之齡都成年。
或者如阿貓所言，最新呢篇文入面好多資料係秘料，每段之後o既紅字就係字，唔係超連結，有心人想求證都唔係咁易，可能要靠個腦去評定，或者唯有等週刊去代大家查查。得個來源又唔可能提供進一步資料，加埋原居民身份，同埋用字稍見狠辣，博內爭論可以停，不過都係招來黃世澤同Uncle Ray隔空反擊。而o係高登時事台，阿貓o既文章就被巴絲（巴打絲打是也）荊無命轉載，兼嘗試討論原居民同非原居民有冇得同獲遷村，收地賠償係咪比其他同類情況過高等，但幾乎係起得個頭無以為繼。
講返菜園村在11月19：前一晚陳景輝問，朱凱迪答，搞成五條答問（臉書／獨媒），解釋賠償，未搬等。當日村民同支援朋友六百人等o左一個上晝無大動靜，下晝一兩點以為真係發生，結果到o左下晝兩點四十八分，地政處就宣讀聲明，收地受阻，感到遺憾，部份人就移師中環美利大廈去也。
對於「最終無事發生」，之後o既11月20日，兩位前一日在場o既朋友熊一豆同周思中（臉書／獨媒），各自寫o左自己所感。長氣有時，威猛有時o既熊一豆認為，有講法話政府因為唔想有人打破現有方式，於是大力打壓菜園（新）村（例如上面朱凱迪〈為新家園戰鬥到底〉所講），未必係真，傲慢作怪就有。而呢一日等，靜，磨人，痛苦，頂唔順，抗爭，或可能令「小學雞政府」鬆化——連高登話都出埋。至於一向好似抽離少少o既周思中，就對等有另一o的體會：等既可以生閒，而地政o係o個日等到走埋，不拆（至少o係o個日以至之後N日啦，八方諗）實現到，護村完全成功，去唔到媒體頭條頭版，可以話係突破到一般人對拆遷o既想像。社運八方又諗，雖然11月19日有加樓宇交易印花稅、廣東輕微地震同田北辰退出自由黨三條港聞同時「爭輝」，但如果冇呢三條港聞又無更矚目o既消息，呢日o既等，o係主流媒體位置又有幾前？o係呢件事上，社運o既重視，又能唔能夠，要唔要，同埋點樣成為大眾o既焦點？
周思中o既睇法相對新鮮，回應比較多。Joao就講到時間o係基進運動o既必要，蔡芷筠就認為等可以建立到感情（八方又要加把咀：八方以前認識唔少前線傳媒朋友，佢o地有時難免o係現場等新聞，雖然通常唔似得對佢o地又愛又恨o既社運人等咁長，但每次等，就有機會吹水講爛gag互相認識等等，又係建立到感情），Joao再回話，等，就帶來意義，重重覆覆不覺累機器唔會搞得掂。Wright Fu就指，等，打破o左無耐性同唔好同陌生人交心o既港人慣習。
正文之外，轉載亦有o野睇：Johnny Cheung就話篇文可以反思衝係咪好；方富潤就擔心，抗爭者等多幾次，就似曹劌講打魯國o既齊軍，「三而竭」。
頭頭問起菜園村同大眾焦點o既關連，熊一豆最新o既文章亦希望更多朋友加入關注件事。社運八方又諗到一o的o野，就係參與人數數字：保菜園村到而家，人數暫時以百計，而月頭大家相傳大家樂太刻薄，又打算罷食，人數萬計，年頭反高鐵又係差唔多人數，箇中有乜啟示，暫時未睇到有朋友討論；如果加埋八月四巴司機罷駛，同有網民提過（惜討論已沒於網海），幾年來撐清潔工保安員o既行動又係人少少，真係唔知如何講起——話人數唔係咁緊要好呢，定係要梳理出參與人數高低o既規律？之於後者，高登巴絲膠洲彎話係有傳媒因素，可唔可以係一個起點？
除o左人數多同罷食，大家樂太刻薄一事亦帶出另一o的討論同行動。梁寶同小西發起o既小店是寶討論，就趁大家非難大集團時再次提起，個相關facebook group重進化成page添。馬老闆馬國明就由連鎖快餐店o既生產方式，同大家簡介下何解連快餐店基層員工「被刻薄」，以至提到經驗o係連鎖快餐店入面點解唔會生成。接落來，就有朋友討論連鎖店vs小店，同埋技藝（craft?）o既存亡等等。熊一豆由賺盡講起，小西同黃力加入，講到去股東、股票、投資同金融。
草草收尾之前，想介紹多一篇新鮮滾熱辣，將大家樂同菜園村並談o既文：白明（黃靜）o既〈我們逐漸相遇〉。社運八方諗，黃靜點出消費o既政治力量，又可以反映眾人o既諗法，固然係梳理到最後一寸一分清清楚楚；但罷食同菜園村o既連結，又好似稍為勉強——除o左有一班人兩次行動都全情（未必全程啦）參與外，兩次行動參與者未有交疊o既一群，又係咪又留意下？的確，可能真係有唔少朋友唔介意罷食大家樂一日，但對於菜園村，佢o地會咬牙切齒o架。