朱小姐最新玉照。
最近社運八卦事，莫過於朱凱迪、區佩芬嘅BB。本來阿B預產期係12月14日，但一直留係媽媽肚裡，不願出來，搞到21號要到醫院催生，各友在外圍觀都已經好著急，做老豆的當然更是心急如焚。
最慘嘅係，朱凱迪喺區議會選舉前後，諸事不順。皇后碼頭當年，佢同何來做保育人士代表，申請法援以司法覆核嘅方法來作最後鬥爭，點知因為法援同法律程序開始中間出現咗三日不受法援保護的「空窗期」，兩人的司法覆核被駁回，而且在零七年九月被判要支付堂費。兩人雖有法援保護，但原來那三天「空窗期」的法律開支足已致命，律政司在官司結束兩年後向二人追討廿七萬堂費。其實律政司係有酌情權不追收款項，當年領匯案便如此，去年智障童司法覆核案亦如此。而且，當時又正值菜園村同反高鐵運動如火如荼，社運圈子都覺得是政治打壓，覺得無理由賠錢，朱何二人亦作了破產的打算。
但法庭於2011年中不單止將欠款由原來的廿七萬提高至廿九萬，仲將利息定到九厘幾。由07年拖到09年，其實要破產的話，多一兩年就完事。但政府唔申請佢地破產，欠債又一日以60幾蚊(利息)的速度累積，咁搞法真係長期俾對方揑死。譬如話，若有一日朱迪諗住參選，對方先出破產令，咁佢就只有「吮手指」。經過多番思索，最後本土行動幾個核心，決定要幫朱凱迪止血，先借錢籌旗，還咗累計至今30萬嘅欠款，再公開籌款。
除咗欠債外，呢個老豆仲孭住單刑事官司添，而且剛好今早過堂。朱凱迪幾驚因為過堂而唔可以陪住區佩芬過分娩一刻，由禽日下午開始催生就一直擔心。好在，BB 等到老豆過完堂返醫院先出來，不過區佩芬就足足捱咗二十個鐘陣痛。
由禽晚到今日，幾十個社運友好係面書等消息，朱迪間唔中更新下情況，YC今早跑到醫院做攝影直播，很是緊張，Tang Sui Wa 嘅status status 描寫了大家嘅心情：
「好緊張，有冇人報告區佩芬狀況？區佩平時替朱迪做賢內助極度低調，但其實在日本反G8時她根本是社運花蝴蝶，幹練通明矯捷，簡直強大得像一個持久的奇蹟。過後又回復低調，他們一家搬進了八鄉後一年都沒法和區講一句話，今日醒來心焦如焚。昨晚區佩已進了產房，仆街政府卻要朱凱迪今早到東區法院過堂，今日還要是冬至大節。政治檢控仲要做得咁仆街，恬不知恥的特區政府仲有有無人性！？全線呢單CASE經過手的爪牙鷹犬一定俾天收，自身損壽兒孫折福田宅脈斷，朱區一家三口吉人天相猶自可，否則你老味再毒的詛咒我都講得出。念力支持區佩芬！念力念力念力！」
區佩芬確實偉大，多年來無限量咁支持朱凱迪以至同佢相關的工作同運動，大家當然勁撐佢。依家母女平安，BB 7磅幾，眾人大喜，接著落嚟談論嘅方向會係 bb 女嗰名，可能要啟動「五區公投」去做決定。
各位社運八卦友，唔好淨係圍觀，請捐款支持，幫忙解決30萬嘅皇后碼頭司法覆核費。（詳情稍後公佈）。