（獨媒特約報導）去屆區議會選舉，當時屬素人的「傘兵」東九龍社區關注組成員的陳澤滔，在觀塘區議會「康樂」選區挑戰建制派馬軼超，僅輸99票。今年即將換屆的區議會選舉，再有素人在「康樂」積極考慮挑戰，今回是任職電梯工程師的陳嘉言。

陳嘉言自上年7月起投身社區工作，標榜專業知識及實幹，考慮於11月區議會選舉挑戰觀塘「康樂」區區議員建制派馬軼超。陳嘉言指，康樂區內有許多老舊私人樓宇，希望以自己對工程的專業知識，幫助街坊處理大廈維修問題。他認為社會政策應以「由下而上」的方式倡議，「我覺得社區政策係要居民參與發聲，區議員要諮詢晒居民意見，綜合諗一個最好嘅解決方法，先向政府提議」。

政府近年不斷在各區推動興建升降機，部分選址欠理想致令使用率低，部分則設計欠佳。陳嘉言是電梯工程師，而「康樂」區內，亦正巧有一項升降機工程。

去年2月，路政署根據現屆區議員馬軼超的建議，向區議會提交「聯安街至功樂道升降機」設計圖，連接功樂道住宅及牛頭角站，方案獲在席議員支持。惟陳嘉言認為該方案有不少弊病，例如阻擋富麗花園住戶景觀，「上年年頭政府出咗設計圖，要拍板起，富麗花園居民先如夢初醒，覺得要反對」。於是他研究出「花園大廈方案」，工程難度較低，對鄰近居民影響較少，連接港鐵站的路程亦較短。在民政處諮詢期間，陳嘉言聯同區內居民發起聯署行動，連同替代方案研究報告及300個聯署遞交。

「居民唔洗『食死貓』，而且路政署都覺得咁樣易起啲，因為唔洗跨過大廈」。不過「花園大廈方案」引起馬軼超不滿，並收集約900個居民聯署並去信路政署要求實行原有方案。不過，路政署最終採納陳嘉言的替代方案。

原有方案沒有如期落實，陳嘉言坦言確實引起部份居民不滿，但他認為問題主因是現任區議員沒有向居民做足諮詢，「好多區議員覺得自己諗法已經代表晒所有居民嘅想法，無真係落區同街坊傾、去諗唔同方案，就已經同政府講爭取呢樣嗰樣。」「作為負責任嘅區議員，所有政策都應該同街坊傾，攞最多嘅料，跟住去分析問題最好嘅解決方法，而唔係自己諗完覺得點就點」。

民主與民生息息相關，這是陳嘉言的想法，「前幾年我受傘運啟蒙，參與地區工作，例如洗樓隊，同居民解釋點解要佔路，俾佢哋知民生同民主係扣連。你無民主，政府同議員係唔會聽你講嘢，你攞到嘅可能只係蛇齋餅糭。有啲人可能住緊劏房、政府政策好差，一路都無改善無監管，公屋又唔起……地區工作係俾佢哋嘗試了解示威者嘅途徑。」

「當時覺得義工身份做到嘅事唔多，帶嚟嘅改變唔大。區議員攞住千幾票授權，發表意見時可以更加攞到政府同大眾嘅尊重，影響力更大。」

陳嘉言任職電梯工程師時經常於觀塘區工作，決心參與社區工作後，便於上年6月辭去全職工作，騰出更多時間投入地區事務，「希望造到實幹形象，勤力啲開街站，令街坊支持我。」他表示自己任職工程師時已習慣看政府文件，希望由此著手改善民生，「自己研究能力強啲，鍾意進一步畀埋建議政府。」

對於對手，陳嘉言認為他或認為自己已有足夠「鐵票」連任，處理地區問題時「不太進取」。例如「康樂」區欠缺垃圾收集站，居民經常將垃圾隨街棄置到約定俗成的位置，結果老鼠橫行，「居民有同佢（區議員）反映意見，但反映完發現無改善就唔再反映」，「只係識同食環投訴，無解決問題」。

問題已存在40年，「當現任做唔到嘢嘅時候，我就諗，喺現任以外可以做到啲咩。例如同清潔工、裝修工人傾吓，睇吓佢哋有咩意見」。陳嘉言引述裝修工人意見，認為宜安街街市內的停車場十分寬敞，亦長期沒有車輛停泊，內裡亦有垃圾處理設施，相信能夠改建為24小時開放的公眾垃圾收集站。

「有好多人覺得泛民唔識做實事，淨係識示威，我想展現個形象俾佢哋睇，其實我都識做實事，我做嘅話仲可以好過你班建制派。現任區議員banner都寫住自己做實事，但佢嗰啲實事做咗咁多年，都係解決唔到（社區問題）。我就希望而家俾我嘅建議出嚟，如果當選到區議員，就有更加大嘅壓力俾政府，去執行我嘅建議。」

觀塘區議會近年最聞名社會的，是造價近5,000萬的觀塘音樂噴泉，陳嘉言亦批評區議員「好大喜功」，「音樂噴泉之後，又有康寧道公園及駿業街球場改建，要洗5億，係更大嘅大白象」，「佢哋鍾意啲好大喜功嘅嘢，洗錢唔留手，我就覺得呢啲大白象好差勁，資源其實可用喺民生方面，而家交通小巴線都唔夠，醫療都係要改善嘅嘢，而家成日藉口話聯合醫院擴建，話擴建完就夠位，但其實有好多細診所可以開住先，呢啲都係區議員可以做但無做到。」

「仲有好多細嘅地區委員會，年年搞好多國慶、回歸嘉年華、大食會，其實嗰度都幾十萬幾十萬咁去。用觀塘區議會個名去搞，到時建制派就會現身，話『大家好、希望大家玩得開心』，好似個活動係佢搞咁。而呢啲活動一定過到撥款申請，因為議會建制派多，所以無辦法阻止到佢哋搞呢啲蛇齋餅糭。」

觀塘一直是「紅區」，現屆區議會37個議席中有28席都屬於建制派，陳嘉言有沒有信心可打敗建制派「對家」？他說自己的準備時間較長，「實幹形象」應該能獲得街坊支持，「雖然處理唔晒咁多社區問題，但呢一年都展示到俾大家睇自己係有能力、有心去做好社區」。

「康樂」選區現任區議員是獨立建制派馬軼超，他於2007年首次當選，擊敗爭取連任、剛退出民主黨的徐永銓及獨立候選人林劉少珊。去屆區議會選舉，「傘兵」、東九龍社區關注組成員的陳澤滔挑戰馬軼超，馬獲得1,624票成功連任，陳澤滔僅輸99票。

記者：陳康麒
部分相片由受訪者提供