其實做人喺愛情上、生活上、工作上好多時真係要睇 Timing，以前細過都唔係好知道咩係"Timing"，到大個咗先開始理解到咩一回事。
呢幾日我比較關注嘅係台灣八仙樂園單野，因為呢件事對我黎講都幾震撼，係一個樂極生悲嘅慘劇。我自己睇咗好多當地新聞、事發經過片段，好多故事，亦留意到好多人對於呢個慘劇有唔同嘅感受
我自己都上網睇過下究竟燒傷嘅後果同影響係點，原來真係幾恐怖。燒傷程度分成三級，如果係一級同二級燒傷都叫做「還可以」，因為好多時幾個星期內傷口會自己癒合，代價可能係有疤痕。
但如果係三級燒傷，就咁好大件事，因為燒得好深好勁，基本上係需要皮膚移植，同埋傷口需要長時間去癒合，而且係一定會有疤痕。
我自己細過都試過比火燒親，但我講緊程度係比火「辣一辣」，但已經痛到想死，而且仲會又熱又痕又痛又紅，就算你拎凍水沖住都覺得好痛。所以一聽到佢地大範圍面績燒傷 + 二級或以上程度，真係聽到都覺得痛。
呢兩日都有唔少人對於張潤衡想去台灣探望傷者或提供支援而引起好多討論有人覺得佢唔應該去，因為好似喺傷者傷口之中灑鹽，試問一個十幾歲嘅後生仔女，正值人生最青春時期，當佢地見到一個曾經受到燒傷而毀容嘅人，你叫佢地點接受到？
亦有人覺得作為過來人，應該明白傷者感受，去台灣為傷者家屬提供輔導支持，發出正能量係一件好事。最後就算張潤衡 Facebook 有大量反對聲音底下，佢仍然堅決去探望傷者。
張潤衡話臉部受傷的過來人探訪燒傷病人，會引起傷者不安，甚至會為他們造成嚴重打擊，如果以照咁嘅邏輯推論落去，佢就話係咪唔可以去幼稚園接送上下課，甚至是出席家長活動了，因為佢個樣會嚇怕學校嘅細路？！
喂，大佬，你講邏輯推論，但竟然咁樣去推論？問題呢家你去探訪嘅對象唔係一個正常人、唔係學校讀緊書嘅細路，而係岩岩受咗八仙慘劇可能即將毀容嘅青年，你咁樣去對比?
其實講到尾都係 Timing 問題，要去為傷者同家屬提供輔導、心理支援係必需。因為好多時候會有好多創傷後遺症、接受唔到自己毀容/身體上痛楚而有自殘/自殺傾向、特別係情緒上波動，亦對將來生活有迷茫，呢個時候的確係需要心理輔導支援，而過來人作分享比意見亦係必須
但絕對唔會係呢個時間。 以上情況大概係傷者進入復康階段，生理同心理上都經過時間而有所平伏落嚟時侯先去做。
張潤衡係一個社工，佢應該明白傷者呢個時候最大嘅 Need 係啲咩，係medical 嘅支援同休息定係心理輔導?
如果係傷者家屬要求且主動聯絡佢，我覺得見家屬係絕對無問題。因為佢地都需要過來人為佢地解答接著落黎既事或將來條路點樣適應等等。
但如果係見傷者嘅話，就絕對唔會係呢個時候，就算家屬要求，你自己都需要判斷一下呢個情況係唔係合適，唔係人地要求就去做。
我如果係傷者，我要接受自己受到毀容嘅樣，我真係答唔到你，基本上「接受」係一件好難嘅事，我情願拔喉好過。而你作為過來人，你係成功例子，我敬佩你努力以至今日你生活都算美滿，但我都相信你需要一段好長時間去接受同適應先行到今日。
試問一班後生仔受完一輪驚慌、伴隨住身體上嘅痛楚，見到你時候，你覺得佢地會有諗法？
有時候好心人想做好心事，往往都會做錯事。例如八仙工作人員見到眼前成堆傷者，且傷者要求用水淋自己，但工作員情急底下竟然用超強水柱直接近距離噴
而另一個工作人員見到眼前有個女仔變成火球，情急底下竟然用滅火筒噴向個女仔，結果引來第二次塵爆，害左個女仔。
以上工作人員唔可以話錯，係一個前所未見嘅情況下，你無可能咁理性準確咁判斷原來呢場火係唔可以用滅火筒，亦分析到佢地燒傷程度。但係，當有足夠時間比你去判斷，當身邊好多人向你說明事件分析比意見。若然你做錯了，我就絕對唔會話你係好心人想做好事了。