適逢香港DSE考試，告別了公開試十多年的我對此有感而發，全因家中那個不知是樂觀還是唔識個死字點寫的小弟弟。想當年我也是好逸惡勞之人，但死到臨頭仍會乖乖熄機，起碼整個靡爛的生活習慣都會改變，就算於事無補都對得住良心。但我發現他考文憑試期內，仍打機不絕。
之後我跟娘親反映事件，她回答我：「而家鬧都冇用啦，聽日都考咯。」我知道她想說一切都太遲。但我回想起我半年前都反映過同樣的問題，她也是答我一句：「而家鬧都冇用啦，都剩番半年。」我再回想起，原來幾年前同樣的情況、同樣的人物、同樣的對話、同樣的心灰感，「而家鬧都冇用啦，個底都打得唔好。」就係咁，弟弟不知由何時開始被放棄，如果現在才起步就真的太遲了……仲認為太遲？DSE才是人生的開始，記住「沒有東西應該要遲過放棄」。
而在網上就有一個經常出現的問題：XXX會否太遲？例如「我28歲先轉行會計會否太遲？」、「我20歲先學琴會否太遲？」他們經常被時光飛逝所打擊，心想真的太遲，於是未開始先放棄，奈何當你問一句「會否太遲」時，已經又遲了幾秒呢？英國小說家George Eliot曾經講過：It's never too late to be what you might have been。老生常談，即係有心唔怕遲。人們怕遲係因為怕落後，然而唔起步又如何追前呢？香港人尤其怕落後，甚麼「輸在起跑線上」、「執輸行頭，慘過敗家」，當知道自己落後於人，就情願放任，都不願努力追上，「怕遲到，終失約」，連政治態度都一樣……
轉載自《新報》