森林法則，弱肉強食，放諸於樂壇也如是，你如果冇大公司照住，好容易就會被人所淘汰。可是獨立發展的MastaMic，有自己的生存之道，佢一邊「忍辱」接job，一邊仍在創作中宣洩不附炎的態度！呢張「磨」咗好耐終於出嚟嘅《MASTAPIECE》，都有啲體現咗呢兩面性——佢既不排斥市場所需要的音樂（情歌）元素，也有忠於自己嘅嘢喺入面，但講到底，MastaMic到現在，仍屹立於樂壇嘅重要原因，係因為佢有強大的創作或說唱實力作支撐。
新專輯名"MASTAPIECE"，按封面的拆解是"MASTA"加"PIECE"，幾乎每一首都有不同嘅主題或「個性」，而整張嘅音樂元素，也較上一張豐富。個人覺得比較有新意嘅係加入咗道教色彩的《破地獄》（念誦咒文同rap喺某程度上其實有共通之處），馬米口聲聲話要開壇超度嗰d冇料扮有料、玷污hip hop文化嘅「裙腳仔」（可能影射了《中國有嘻哈》熱潮下所冒起嘅「牛鬼蛇神」），但實際上馬米係陳雲「上身」，希望佢哋「落地獄」！MastaMic雖然玩嘅係hip hop，但佢"living like a rockstar"，喺《Rock$tar》中，佢用"$"呢個符號放喺歌名度，就已經暗寸咗好多玩搖滾嘅人，其實係追求hit rate、追求成名；MastaMic喺呢首歌裏面不僅表明了自己敢剷平道德高地的真·搖滾精神，而且仲用咗令電結他「勃起」般嘅編曲，喺形式上將搖滾同hip hop相結合。
MastaMic嘅呢張新碟，有對網絡時代的觀察和反思，像《I.A.D》談到大家喺虛擬世界變換另一身份後的真假難辨、無需負責任的網絡欺凌等問題，其Chillout的氛圍承接了前面《Backseat Love》的Urban抒情調色，迷離、夢幻又具閒晃之感，如能讓人遁逃入幻想空間，或是漂浮喺虛擬的雲端之中。而《DMSPF》，就是"Don't make stupid people famous"的縮寫，網上/現實世界太多「做垃圾會上榜」嘅人出現，搞到「香港都就快變垃圾天堂」，因此MastaMic借著較沉重、暗黑的trap，表達了對呢種劣質風氣的不滿或憤怒。
積極回應社會不斷發生的事件/變化，係一直堅持做HK Rap Up的MastaMic，其音樂上嘅一個很重要內容。新碟中較出位的《Sound of Violence》，仿佛係對前幾年旺角騷亂（或「魚蛋革命」）後，有關「暴力」話題的再探討。歌中絕大多數嘅句子內，都含有「暴力」兩個字，在能夠起到強調之作用外，又增加了rap詞嘅嗰種特意要製造出的「壓迫」感；而短短三分鐘嘅呢首作品，深入地rap出了「暴力」的起源/成因、「暴力」的分類（善的「暴力」與惡的「暴力」）、「暴力」的表現形式、乃至以暴易暴是否算「暴力」等具思辨性的問題；MastaMic喺這塗上了澳洲土著部落音樂底色嘅歌曲嘅Verse中，採取咗喃喃誦經般的rap形式，然後到Chorus內有落差感嘅提高式處理，起到咗被迫埋墻角後的反擊效果。
歌路多變了嘅MastaMic，喺rap嘅技巧或能力方面亦有所增強。用嚟battle肯定會打低一大班「求其兩三下手勢就已經見底」嘅rapper們嘅《Fire》，可謂是《Hate Me》的2.0版本；其有可能刷新了廣東話rap之紀錄嘅速度，與《Hate Me》去比較，簡直如同用高鐵和跑車的速度來相比。《Fire》呢首點燃起MastaMic小宇宙嘅作品，是攻擊hater們的超級武器；而馬米也自知咁樣做法，會換來對他炫技的批判，所以佢喺歌中已經戴定「頭盔」（「的確Hip Hop唔係講速度，速度再高都唔等於rap得好」），在show off自己夠快又夠咬字清晰的實力之外，亦示範了香港的hip hop作品都可以靠「恐怖」嘅flow，嚟產生能令人興奮嘅音樂威力。
新專輯《MASTAPIECE》，喺《Fire》的高潮之後，像慢慢疲軟下來，但rap詞像新詩一樣的《思想流浪》，又喺音樂「軟」了嘅基礎上，給你煥然一新的高透氧效果，或為被擠壓、快填滿的都市人，帶來「昔日擁有過的知覺」。而跟鄭欣宜合作嘅《Not Afraid》，是屬於很多rapper都有創作過的「振作宣言」式題材（佢自己都有首題材近似的《Loser》）；馬米rap得真摯，從近年彷徨墮進入陰暗的時期，rap到要面對自己嘅恐懼，再到喺逆流中奮力游上去的昂然前進、信念堅守，連featuring的欣宜，都出我意料之外表現出色，令這其實沒有太多新意嘅作品，增強了義無反顧的生命力度！
馬米嘅呢張《MASTAPIECE》，絕對係有火有自信、接近Masterpiece級數嘅專輯，它不止是速度上，乃至喺音樂資素方面，都超越了而家市面上的很多唱片。然而在森林法則內，還有適者生存嘅一條，Rap得太快、也走得太快的MastaMic，或者會被追趕不上的樂壇所淘汰。要打破「想求存甚至要將道德獻上」的慣例，或者可能需靠大家不要再繼續make stupid people famous，而是要令到強勁嘅人，變得famous！
首選：破地獄
評分：8.1/10