阿媽成日播o個首歌話「恩怨愛恨／世事如棋／每局都充滿迷離」，呢幾日上飛卜，我就知咩叫迷離喇。

巴黎恐襲，死好多人，槍手專登衝入去巴黎人最enjoy o個 d cafe呀演唱會呀博物館處掃射，好嚇人。全世界悼念，香港又悼念，但原來悼念都有得嘈。呢兩日我不停睇到「指責悼念」o既 status 同長文，好多人講緊，好多人激氣。

有一種係話，「而家巴黎恐襲你就咁關心，黎巴嫩等其它中東地方被轟炸，死得人更多，你又有無關心？」我朋友話，呢種叫左膠。

另一種就係話，「轉profile pic就表示關心巴黎？好廉價！」我朋友話，呢種叫熱狗（我唔知點解唔係右膠？）

我覺得迷離既係，明明係悼念，點解會變左互相指責？左膠又點知人地無關心黎巴嫩呢？就算人地當時吾知，而家先知，又駛唔駛鬧呢？至於後者，其實鬧人的熱狗，本身又做左乜野咁唔廉價呢？咪又係坐響香港上下fb打下status。

呢兩種膠邊種煩d？我睇到葉一知，各屌左一邊一鑊，屌左膠的po有14xx like，屌熱狗的po有34xx like，我諗都係熱狗煩d。

我覺得，左翼係煩膠，佢地係周星馳《西遊記》裡面羅家英扮o個個唐僧，成日同你講大愛包容，成日懶係國際化，成日教誨人。不過熱狗要管到一個人生活咁細的細節，例如轉profile pic咁，真係仲更加唔得掂。但係我又何必比較呢？咁就好似比較隔左一晚的餸菜難食d，定係隔左三晚的餸菜難食d。點解我地唔可以有常識？點解唔可以食餐正正常常的飯，上番個正正常常的fb。

我讀書少，副學士小薯仔一名，以上講錯唔好打面。