弁言
筆者終於的起心肝，花幾百蚊買下漢娜．鄂蘭最優秀的傳記《愛這個世界：漢娜鄂蘭傳》。
厚逾八百頁的巨著到手，筆者迫不及待翻啊翻，務求先看「學術八卦」。
列奧．史特勞斯（Leo Strauss）與鄂蘭同是德國出生的猶太人，同樣去德赴美，但兩人一生幾乎毫無交集。
傳記披露其實是有的。1930 年代，史特勞斯在普魯士國立圖書館偶遇鄂蘭，從此拜倒裙下。
讀者很易在網上看到鄂蘭的豆蔻年華，是智慧和美麗完美交融，恍若天使迷路誤闖人間。她的一生與歷史互證，堪似驚濤拍岸，在紅塵勾起卷卷雪花。
但史特勞斯無緣進入她的生命。鄂蘭嫌他太保守，斷然開除他的兵籍。史特勞斯悻然而退。縱然日後同在芝加哥大學任教，但兩人老死不相往來。
鄂蘭曾寫信給老師雅斯培（Karl Jaspers），私下提過史特勞斯：
「他具有真正的智慧。我。不。喜。歡。他。他應該有五十多歲了。」
「慘慘豬。。。」從此筆者看史特勞斯著作，每遇不明處，都充滿無恨同情。興許因為所有腦筋都埋首於書，導致腦部失調，得到智慧卻喪失追女仔的能力。字字血淚，青史斑斑，筆者不禁掩卷長嘆。
究竟毒毒該如何突破「史特勞斯陷阱」此一歷史循環？筆者訪問了三位 A0，盼為所有同襟帶來啟發。
＊ ＊ ＊’
一
問：你今年幾多歲？
Jason：30 歲。我唔係食齋，我鍾意女仔，但一直冇拍過拖。
＊ ＊ ＊
二
問：由細到大你暗戀過單戀過追求過幾多個潛在對象？
Jason：小學嗰啲講笑咁講，唔係好重要。之後嘅我真係要數，你等我一陣。。。
原來有 11 個。
問：嘩、嘩、嘩！
Jason：其實唔算多。17、18 年嚟除勻咁計，即係一兩年先有一個潛在對象。你覺得多定少？
問：多呀～
＊ ＊ ＊
三
問：11 個人之中，有幾多人你追求過；有幾多人你表白過？
Jason：大約有 8 位我採取過主動。
至於表白。。。我唔直接講。我講對方拒絕嘅次數，即係佢知我想點樣。我正式收過三次回絕。
因為有兩種情況。一種係回應表白嘅正式回絕；另一種係你感覺到雙方關係出問題。因為對方知道你有意思，開始避你，你唔駛表白都識得放棄。
＊ ＊ ＊
四
問：你唔似坊間對「毒毒」嘅標籤，匿埋一角粒聲唔出，其實都幾主動。
Jason：我以前係咁架！但而家人大左，識得要主動啲。二來出嚟行，唔好俾人太容易睇出你內向。我的確內向，但外人未必知。
＊ ＊ ＊
五
問：有冇諗過點解冇一次開花結果？係土地問題抑或其他？
我知道男仔分兩類，一種係見到啱心水就會去追；另一種係見到心上人就會考慮一生一世，諗到結婚同責任，因為持重而磋跎，錯失機會。你屬於邊類？
Jason：我的確會考慮好多嘢，諗得最多嘅就係相唔相處得埋，又會諗雙方性格夾唔夾，遇到分歧會唔會有拗撬。
最重要係拍拖一定有開心有唔開心，後者好影響自己同對方，甚至對世事嘅睇法。如果拍拖花左好多時間喺磨合同爭吵，到頭來都要分開，係咪浪費對方同自己時間？
我未諗到結婚生仔，就已經諗好多嘢。我好驚嘥對方時間。
我諗我天生性格係咁，我唔信拍戲嗰種浪漫，我相信愛會轉化成細水長流。希望長遠證明彼此契合，雙方嘅經歷都冇白費。
＊ ＊ ＊
六
問：有冇人依然放喺心上，仲耿耿於懷？
Jason：近啲嘅人感受當然會重啲。過去有一位對象嘅處理手法，的確曾令我比較唔開心。但我盡力同所有人保持朋友關係。
11 個人之中，有一位識左好耐，曾幾何時大家都 feel 到想行前一步，佢行得比我更前，反而係我短路。我自覺縮得好難睇，令到對方尷尬。好多謝佢嘅大量，我地繼續做朋友到而家。
我從來冇諗過番撻。當我追緊一個人，過去嘅人我都會放低。如果而家我有一個心上人，呢個人當然最緊要。
問：嗯嗯我好明白。
＊ ＊ ＊
七
問：過去嘅失敗令你有咩改變？
Jason：每一次經驗都學到啲嘢。我由好被動變到主動啲，要用好長嘅時間慢慢轉化。
朋友曾經問過我，邊一個傷得我重啲。我有諗過，但唔一定係對方傷我，而係我自己無可以避免感到痛苦。
任何傷害都抵銷唔到我愛一個人嘅滿足感。我好感恩我冇放棄，要多謝佢地每一個人。
感情路上一定有波折，有啲原因在於自己；有啲原因在於命運，唔完全係自己問題，我冇遺憾。
＊ ＊ ＊
八
問：最後一條問題。咳咳，我邱比特上身，有冇說話想借訪問去講？
Jason：我會再勇敢一啲爭取，用自己認為啱嘅方法；用對方接受到嘅方法去追。唔會為左就人而放棄；亦唔會唔顧對方感受。
＊ ＊ ＊
＊ ＊ ＊
＊ ＊ ＊
參考文獻：
Carole Widmaier《政治哲學終結了嗎》
孫傳釗〈列奧．施特勞斯與漢娜．阿倫特〉
伊莉莎白．揚．布魯爾《愛這個世界：漢娜鄂蘭傳》