興完ice bucket challenge，遺忘已久既tag人風氣被召喚返出黎。呢排係instagram 或者facebook 又流行另一個tag人遊戲，叫做20 facts，姐係被tag既人就要打20個自己既facts出黎。呢次既遊戲就完全冇任何慈善既意義，純粹滿足人性，將自己好想比人知既野可以有藉口，好 似食左誠實豆沙包咁一次過打哂出黎。
呢一代玩開instagram既人可能未必知道，呢一類既tag人作答遊戲係幾年前既xanga時代已經出現。以前既中學年代最鐘意就係tag d 同學仔，答埋d又長又chum既100條問題，乜野你幾多歲，你電話幾多號，你最鐘意咩顏色，邊個朋友唱歌最好聽，被tag既人都會即刻食左誠實豆沙包， 所有答案都答哂出黎，開頭都會好好心機咁答，去到50幾題左右就開始心諗答完未呀，去到70幾題就會開始亂答。好彩果個年代未有咁多網絡欺凌同高登起底， 如果今時今日仲有呢d野，我諗d mk仔女既電話都會幾唔得閒。
以前既xanga問卷，遇到d唔想答既問題，仲要諗下點答先至風趣抵死，懶既又或者想型既就會打“唔答”。而家呢個20facts就唔同喇，自由度大好 多，唔洗等人問你先可以答。20個facts，要自爆d咩完全由你自己慢慢度，將想比大家知道既一面左諗右諗，再逐項逐項打出黎。入面不外乎都係講下自己 認為自己係點既性格，例：我係一個慢熱既人；我好易喊；我好大懵；我笑點好低好鐘意笑；我好硬頸好執著etc.，通常都係冇咩特別正面或者負面既影響。緊 係啦，唔通我有公主癌又打出黎話你知咩。至於佢打d野係唔係真，當然唔係自己打完出黎話係點就係點啦，都係要由睇果個人決定既。不過當然，係得 instagram或者facebook打得比人睇，又有幾多人真係同你好熟知你咩性格丫，你話係咁咪咁囉，我都係無聊碌下facebook姐攝下時間 姐。
打得出黎比咁多人睇，緊係要讚下自己啦。例：我係一個會食m記既女人；其實我識煮飯煲湯；我好錫屋企人；一拍拖我就會重色輕友好錫女朋友，etc. 務求將自己直線sell出。所以話，呢個20facts比機會你將自己(應該係真）既優點咁直接打出黎，一d都冇令人odd既感覺，你應該要好好多謝 tag你既朋友比個咁好既機會你。
仲有一種會打既內容，就係將自己既喜惡打出黎，可能係食物、偶像、又或者係人既習慣，不過最多既都係講人既性格。例：我鐘意xx既男人；最憎人冇口齒；好 憎d好嗲既女仔etc，而講唔鐘意既仲要多過講鐘意既好多添。見到呢d反而最令人不知所措同難以理解。見到呢d既時候，真係會心諗一句，so....? 打出黎既目的，可能係想得到人既認同，係comment留一句“5同6我都係呀!!” 可能想人對號入座，想講明拿我唔鐘意你呢挺人架你唔好埋我身同我玩呀，又或者可能係佢身邊有呢d人想打出黎比佢知道希望佢知錯能改。um...我實在睇唔 透，又可能其實係我諗多左，打呢d出黎其實冇咩目的，純粹想講比全世界知我唔鐘意XXXX呀！
就算經過時間既洗禮，以前既年青人同而家既年青人都係一樣，都鐘意係網上世界表達自己，又或者叫自爆。無論係以前既xanga 100問，定係而家既20facts，都符合住後生仔鐘意自爆既心態。人既心態其實冇變，變既只係網絡文化同形式，由 xanga，myspace，facebook，慢慢到而家既instagram，大家都係想將自己想比人知既野用唔同既形式呈現出黎。呢個 20facts，只不過好似潮流咁，間唔中有一個cycle，得閒回下帶，用d以前已經有既方式黎自爆姐。