根據《淫褻及不雅物品管制條例》而成立的淫褻物品審裁處，具備專有審判權，條例指出：「淫褻」和「不雅」包括暴力、腐化及可厭，而物品分為以下類別：
第I類 : 既非淫褻亦非不雅
第II類 : 不雅
第III類 : 淫褻
第I類物品的發布不受限制。第II類物品不得向十八歲以下人士發布；發布第II類物品時，必須符合若干法例規定，包括以封套把物品密封，並在封面及封底印上警告字句。任何人不得發布第III類物品。
很難過最近有小部分人持著極高的道德底線去看書，日本著名作家、屢獲諾貝爾文學獎提名的村上春樹，筆下的《刺殺騎士團長》被評為第II類。不過，在此，我仍是要先膠一下。
到底何謂不雅（第II類）、又何謂淫褻（第III類）？如果在他們眼中，做愛都是不正常、是大家見到要掩眼的情節，那又豈止不雅？嘩！佢除曬衫咁都唔叫淫褻咩！此時，除淨件bikini、淨係隔住底褲磨下磨下，咁樣先係「不雅」。
性愛是人之常情，無論有性先、定有愛先，呢個似乎都唔係大家最關心嘅問題，通常係啲女仔講分手的時候才要撻出黎：你淨係愛我身體，你從來都無愛過我！性愛是人之常情，也是繁衍後代的必經過程（試管嬰兒是很貴的）。如果紀錄片播放動物交配，又是不是第II類？如果明珠台播隻長頸鹿生bb，成個陰部露左出黎，會唔會係第III類？按照當局極高的道德標準，是的。
原來，電影和廣播材料等分別受《電影檢查條例》 《廣播條例》監管，淫褻物品審裁處不會予以評定類別。那是不是即是雙重標準？
而根據政府官網，審裁處由一名主審裁判官及至少兩名審裁委員組成。即是三個人就足夠。既然所需人手不多，筆者現正建議香港改革及重整審裁處制度、提升社會的道德水平：
第一，暴力審裁處。除了原有電影及廣播材料的審查制度，應同樣適用於刊物、書籍等，如果故事牽及警匪、家暴等情節，將被定性為「暴力」。2003年有套很出色的港產片叫PTU，入面有個有權有勢嘅男人（佢咩身分唔講喇，識貨嘅人自然識），叫另一個人捽甩身上嘅紋身，直至見血，「呀sir無話停，就唔准停！」，這套電影恐怕不止涉及暴力、更涉及政治立場。審查處一旦改組，要禁止的電影一定係呢套。
第二，罪案審查處。任何牽及犯罪的情景，都會被評為「鼓吹犯罪意識」，包括Fast and Furious1-6集（7-8集是得到當局機密組織允許行動），呢套西片絕對將「鼓吹犯罪意識」呢個講法發揮得淋漓盡致。紐約、倫敦、東京、古巴、甚至香港！都是飆車（sorry，係非法賽車）的聖地，還有hot爆的girlsss，著住閃令令緊身衫舉住支旗fing黎fing去。佢對大脾呀！！The Rock、Vin Diesel、仲有Paul Walker？！上場嘅架架都係「品牌代言」的跑車，呢套電影完全利用上述優勢鼓吹非法行為。
第三，負能量審裁處。社會充斥過多悲哀氣氛、不利經濟繁榮，因此要有效地裁走負能量資訊。「我愛你，你愛他，他不愛你」呢啲咁慘情嘅句子一律唔准post，「如果拎把鎅刀......」等等！後生仔女，鎅刀係好敏感嘅字眼黎架！貼文一出、會被即時封鎖。至於企喺天台影落黎，玩rooftopping？也是禁止的。所有鼓吹負面情緒的訊息都會被審裁，包括《玩轉腦朋友》入面嘅啊愁！
最後，一個已經存在又很隱形的：政治審裁處。這個機構，大家不言自明，我們都知道它在做緊野。學校是「港獨」的禁區。你們怎能教學生違法？歷史教科書：「香港位於中國南方」用詞不當？！這是要求最高、審得最密而且最惡死的一個審裁處。我們不多說。
《淫褻及不雅物品管制條例》指出：「淫褻」和「不雅」包括暴力、腐化及可厭。其實所謂「可厭」係點界定？很多市民都覺得689可厭，可唔可以將佢封膠、或者唔好比大家喺現實中見到佢？
呢個審裁處得三條友話事，香港啲野真係無代表性。